Ambasadorja e re e Shteteve të Bashkuara në Shqipëri ka nisur sot valën e takimeve me përfaqësuesit politikë në vend, për të diskutuar për perspektivën europiane të vendit, por edhe reformat për sundimin e ligjit.
Fillimisht përfaqësuesja e re e Uashingtonit un takua me Ministri në Detyrë për Evropën dhe Punët e Jashtme, Gent Cakaj.
Sipas një njoftimi të ministrisë së jashtme, Cakaj dhe Kim diskutuan gjerësisht çështje që lidhen me angazhimin e Shqipërisë për çeljen e negociatave me BE-në, kryesimin e OSBE-së dhe marrjen e ulëses jo të përhershme në Këshillin e Sigurimit në vitin 2022.
“Mirënjohës për mbështetjen e pakursyer të Shteteve të Bashkuara të Amerikës për reformat e brendshme dhe forcimin e pozicionit ndërkombëtar të Shqipërisë. SHBA-ja është partner i pazëvendësueshëm politik e strategjik për Shqipërinë!”, shkruan Cakaj në një postim në rrjetin social Facebook.
Më pas, Kim i ka shkuar në zyrë ministres së Mbrojtjes Olta Xhacka, të cilën e takonte për të dytën herë, pas një bashkëbisedimi në Pentagon, vitin e kaluar, kur Ambasadorja Kim ishte pjesë e stafit të Sekretarit Amerikan të Mbrojtjes.
“Është fat për ne, që SHBA përfaqësohen në Shqipëri me një zonjë të kalibrit të Ambasadores Kim dhe jam optimiste që falë punës e angazhimit të saj, bashkëpunimi e partneriteti mes departamenteve tona të mbrojtjes do të vijojë e do të fuqizohet akoma më shumë, duke ndihmuar në modernizimin e FA dhe duke i mundësuar Shqipërisë të japë një kontribut gjithmonë e më të madh për sigurinë, stabilitetin e paqen krah për krah aleatëve tanë amerikanë”, shkruan Xhacka në një postim në Facebook.
Pas marrjes së letrave kredenciale nga Presidenti Ilir Meta, ambasadorja e re e SHBA takoi edhe ambasadorin e delegacionit të BE në Shqipëri, duke u shprehur e gatshme të bashkëpunojë me të në këtë vit të cilin e konsideron si të rëndësishëm për perspektivën europiane të Shqipërisë.
“Mirëseardhje ambasadores së re të SHBA, Yuri Kim. Gati të nisim punën së bashku për të vijuar bashkëpunimin BE- SHBA në Shqipëri, në kontekstin e perspektivës europiane të vendit”, thotë Soreca.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.