Gazeta Si – Tension i lartë dhe trazira në qytetin e Napolit para ndeshjes së Ligës së Kampionëve mes ekipit vendës dhe Eintrahtit të Frankfurtit. Ultrasit e ekipit gjerman janë përleshur me policinë dhe kanë krijuar kaos, duke djegur makina.
Rreth 600 tifozë të Eintrahtit kanë mbërritur në Napoli, pavarësisht ndalimit të shitjes së biletave për rezidentët në Frankfurt. Ata kanë kaluar në qendër të qytetit dhe gjatë pasdites disa makina, përfshirë edhe një të policisë, kanë përfunduar në flakë.
Agjentët e policisë kanë ndërhyrë me mjetet e nevojshme për të tilla raste. Janë dëmtuar po ashtu edhe disa lokale të zonës. Tifozët gjermanë janë shoqëruar më pas për në hotelin ku ata janë akomoduar. Situata është qetësuar tashmë, por trazirat e shkaktuara ishin vërtet të frikshme.
Gjatë rrugës, ndaj autobusëve me tifozët e Eintrahtit janë hedhur gurë dhe shishe nga ultrasit napoletanë. Xhami i njërit prej autobusëve është thyer. Disa grupe ultrasish të Napolit kanë provuar të sulmojnë ata gjermanë, por policia ka shmangur kontaktin mes tyre.
Një helikopter monitoronte situatën, që ishte shumë e tensionuar. Me tifozët e Eintrahtit ishin bashkuar edhe 250 ultras të Atalantës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.