Ukraina nxjerr në ankand kupën e Eurovision, të ardhurat në ndihmë të ushtrisë

Nga Gazeta Si - Fituesit e Eurovision 2022, grupi ukrainas Kalush Orchestra kanë vendosur të organizojnë një ankand për të shitur çmimin që morën për t’i dhuruar më tej paratë në një fond bamirësie në ndihmë të ushtrisë dhe Ukrainës.

Kjo u njoftua gjatë një konference nga udhëheqësi i grupit, Oleh Psiuk, raporton një korrespondent i Ukrinform.

“Ne planifikojmë të nxjerrim kupën tonë në ankand dhe t’i dhurojmë të gjitha paratë për një fond bamirësie që ndihmon Forcat e Armatosura dhe Ukrainën. Shikoni, shumë njerëz tashmë po dhurojnë nga jashtë dhe ndoshta shumë të tjerë do të dëshironin për të dhuruar. Dhe kjo, sipas mendimit tonë, do të jetë gjëja që i motivon ata. Mendojmë se do të jetë e dobishme për Ukrainën”, është shprehur Psiuk.

Në lidhje me zgjedhjen e platformës së ankandit dhe shumën që grupi kërkon të mbledhë, Psiuk tha se do të vendoset në të ardhmen e afërt.

“Do të doja të shihja një shumë të madhe, por nuk dua të përmend ndonjë numër. Do të shohim”, shtoi lideri i grupit.

Gjithashtu gjatë konferencës, Kalush Orchestra, i falënderuan të gjithë për mbështetjen ndaj ekipit të tyre, si midis konkurrentëve ashtu edhe gjatë televotimit.

“Dëshiroj të shpreh mirënjohjen time për të gjithë njerëzit që na mbështetën - ukrainas, diasporë dhe qytetarët e vendeve të tjera. Ky është një hap dhe fitore shumë e rëndësishme për Ukrainën tani. Jam i lumtur që arrita të përcjell lajme kaq të mira, pasi në këtë kohë nuk ka aq shumë prej tyre, dhe unë tashmë mund të shoh se si i inkurajoi të gjithë njerëzit tanë, kështu që jam i lumtur që të gjitha këto përpjekje nuk ishin të kota”, tha Psiuk.

Ukraina mori 192 pikë votimi i jurive të shteteve të ndryshme dhe u rendit pas Mbretërisë së Bashkuar, Suedisë dhe Spanjës. Mirëpo votat e publikut ndryshuan gjithçka. 439 pikë për Ukrainën bënë që ajo të renditet në vend të parë.

Pesëshja e parë në Eurovizion 2022:

Ukraina - Kalush Orchestra: Stefania

Britania e Madhe - Sam Ryder: Space Man

Spanja - Chanel: SloMo

Suedia - Cordelia Jakobs; Hold Me Closer

Serbia - Konstrakta: In Corpore Sano

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.