.png)
Gazeta Si - Elidon Çela, të cilit iu sekuestruan 522 mijë euro të padeklaruara në tentativë për t’i futur nga Italia në Shqipëri, thotë se sasia monetare ka origjinë të pastër.
Në dëshminë e tij, pronari i agjencisë së transportit ndërkombëtar të autobusëve, ka deklaruar se të ardhurat janë kursime të familjes dhe se vinin nga një biznes i pastër.
Çela ka pohuar para hetuesve se për këtë ai disponon edhe fatura. “Mallrat janë të emigrantëve që jetojnë në Itali, i deklarova në doganën e Barit. Paratë vijnë nga biznes i pastër. Ju vë në dispozicion edhe faturat. Kemi biznes, paratë janë kursime të familjes, do investoja në toka me qira dhe bujqësi. Askush nuk e dinte për paratë në autobus, kisha frikën e ndonjë grabitjeje”, mësohet të jetë shprehur ai.
Ndërkohë, Prokuroria e Durrësit ka kërkuar masën e sigurisë "detyrim paraqitje" për ndihmësit e Çelës, Dritan Kamberi e Anold Cankja.
Paratë ishin fshehur në një autobus që mbërriti me tragetin e linjës Durrës-Bari.
Agjencitë ligjzbatuese thanë se kishin informacion prej një muaji për tentativën e futjes së një shumë të madhe parash ndaj ishin në pritje.
Kur autobusi i dyshuar u paraqit në port, ata e kaluan direkt në skaner çka zbuloi gjithçka.
Gjashtë qeset e mbushura me euro ishin fshehur në pjesën e sipërme të një autobusit, pranë kondicionerit. Paratë ishin të ndara në prerje të ndryshme 50, 20 por edhe prerje 10 euroshe.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
