.png)
Gazeta Si - Gjykata e Durrësit ka vendosur të lërë në burg këtë të martë Elidon Çelën, pasi u kap me 522 mijë euro të padeklaruara në Portin e Durrësit.
Sakaq, D. K., 36 vjeç, banues në Tiranë dhe A. C., 32 vjeç, banues në Elbasan, ndihmësit e drejtuesit të autobusit të cilët u arrestuan 4 ditë më parë, janë lënë të lirë.
Avokati i të 32-vjeçarit ka deklaruar se eurot e kapura vijnë nga bizneset familjare si edhe nga puna 27-vjeçare në Itali.
Në dëshminë e tij një ditë më parë, Çela tha se “paratë i përkasin biznesit të familjes sonë, sepse kemi vite që operojmë në fushën e transportit”.
Ai pretendon se këtë shumë e ka deklaruar në Portin e Barit, ndërsa nga ana e grupit hetimor janë kërkuar të dhëna edhe nga autoritetet doganore të shtetit fqinj.
Pasditen e 21 tetorit, u kapën 522 mijë euro të fshehura në një autobus në zonën e kondicionerit.
Paratë ishin të futura në qese marketi dhe u zbuluan nga gjurma e zezë e lënë në skaner dhe u arrestua Elidon Çela, 32 vjeç, drejtues dhe pronar i autobusit me targë AB 633 FZ, pjesë e Agjencisë së Transportit ndërkombëtar të pasagjerëve “Buon Aventura” me seli në Lushnjë dhe Padova.
Kjo nuk është hera e parë që kjo kompani transporti akuzohet nga organet ligjzbatuese. Ajo është hetuar edhe herë të tjera për të njëjtën shkelje si dhe kontrabandë mallrash.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
