.png)
Mes shtetasve shqiptarë të arrestuar në operacionin e fundit antidrogë të autoriteteve belge rezulton edhe emri i Rrahman Rrajës, 27 vjeç.
Kjo nuk është hera e parë që Rrahman Rraja përfundon mes rreshtave të lajmeve të kronikës. Një vit e gjysmë më parë emri i tij u shqiptua në denoncimin e ish-oficerit të Policisë Gjyqësore në Fushë-Krujë, Emiljano Nuhu.
Nuhu kishte marrë padinë e shtetases Xhisiela Maloku, që akuzonte Rexhep Rrajën, kushëriri i Ramazan Rrajës dhe djali i deputetit socialist, Rrahman Rraja për dhunim, akuzë nga e cila më vonë u tërhoq.
Po në këtë dosje është përfshirë edhe një emër tjetër i njohur i fisit Rraja, Redjani, tashmë i arrestuar dhe i akuzuar për atentatin ndaj prokurorit të Durrësit, Arjan Ndoja në ngjarjen e ndodhur në fillim të nëntorit 2019.
Sipas dosjes hetimore për këtë rast, më 30 korrik 2018, Emiljano Nuhu denoncon në Komisariatin nr.6 në Tiranë se është kërcënuar nga Redjan dhe Ramazan Rraja. Në procesverbalin e mbajtur Nuhu jep detaje në polici në lidhje me bisedën e bërë në një lokal në Tiranë me dy personat e kallëzuar prej tij.
“Unë jam Emiljano Nuhu, specialist i hetimit të krimit në Fushë-Krujë. Në datë 27 korrik 2018 jam thirrur nga prokurori i çështjes Mirela Kapo ku më ka deleguar dosjen për hetim. Ajo mu drejtua: Po ta dërgoj ty këtë dosje se bëhet fjalë për shtetasin Rexhep Rraja, i cili është djali i deputetit të Krujës, Rrahman Rraja”, nis dëshminë e tij, Emiljano Nuhu.
Më 30 korrik 2018, Nuhu thotë se thirri për të rimarrë në pyetje Xhisiela Malokun në lidhje me procedimin penal të hapur ndaj Rexhep Rrajës, djalit të xhaxhait të Redjan Rrajës. Ish-oficeri i policisë thotë se seanca e marrjes në pyetje ka zgjatur rreth 2 orë dhe më pas ai ka lënë komisariatin për në drejtim të Tiranës. Këtu thotë se është kontaktuar përmes Ëhats App-it nga Redjan Rraja.
Biseda sipas denoncimit të bërë nga Emiljano Nuhu:
Jam Redjan Rraja. Ti ishe sot që more në pyetje Xhisiela Malokun?
Emiljano Nuhu: Po unë isha.
Redjan Rraja: Çfarë ke me ne që po krruan kurrizin?
Emiljano Nuhu: Nuk kam asgjë po bëj punën e shtetit.
Redjan Rraja: Ku je të vij të të takoj pak nga afër.
Nuhu thotë se pranoi të takohej me Redjan Rrajën në një lokal në zonën e Unazës së Re në Tiranë.
“Më erdhën me makinë të zezë. Të tre u ulëm në tavolinë. Ata m’u prezantuan si Redjan Rraja dhe Ramazan Rraja dhe se janë kushërinjtë e Rexhep Rrajës. Me një ton zëri të lartë dhe të revoltuar më thanë: “Çfarë problemi ke me ne? Për çfarë e ke thirrur sot Xhensilën dhe e ke pyetur për ne?”, dëshmon Nuhu.
Ai thotë se iu përgjigj me qetësi duke u shpjeguar se kishte marrë një dosje nga prokuroria për procedimin penal të regjistruar në ngarkim të kushëririt të tyre.
“Ndërkohë që po flisja ai më thotë: Nuk më rruhet k….. fare për ty që ke ardh nga Berati dhe do të bësh ligjin në Fushë-Krujë. Ne e shkrijmë të gjithë komisariatin dhe ty të s’të kemi asgjë. Do të të zhdukim ty bashkë me familjen, po thirre më njeri nga fisi jonë ta marrësh në pyetje. Do të zhdukim ty bashkë më familjen tënde për 24 orë nëse vazhdon merresh me ne dhe mos të të shohim më në Fushë-Krujë. Ligjin në Fushë-Krujë e bëjmë ne dhe jo ti”, denonconte Emiljano Nuhu.
Në rastin tjetër, 34-vjeçari Rraja, me profesion stomatolog, u hetua dhe më pas dënua me 8 muaj burg për pengim të zbardhjes së të vërtetës në vrasjen e bujshme të Elton Çiços të ndodhur në vitin 2016 në një lokal në zonën e ish-Bllokut.
Rraja ndodhej në të njëjtën tavolinë me Elton Çiçon, me të cilin kishte lidhje miqësore. Pas vrasjes së Çiços, Redjan Rraja shihet nga pamjet filmike të kamerave të lokalit teksa merr me shpejtësi telefonin dhe armën e viktimës, duke i fshehur ato.
Për këtë, 34-vjeçari u akuzua për “pengim të hetimit” dhe më pas dënua me 8 muaj burgim. Gjatë periudhës së burgut mori nofkën “Dentisti” për shkak të profesionit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
