Gazeta Si - Një turiste 70 vjeçe nga Austria ka humbur jetën në një aksident me biçikletë në Përmet këtë të hënë.
Policia tha se rreth orës 13:30, në aksin rrugor Përmet-Çarshovë, në vendin e quajtur "Kthesa e Zhepes", shtetasja austriake H.F., duke udhëtuar me biçikletë me një grup turistësh, ka humbur kontrollin e drejtimit dhe është rrëzuar nga biçikleta. Si pasojë e dëmtimeve kjo shtetase ka ndërruar jetë.
Ky është rasti i pestë i vdekjes nga aksidentet të turistëve të huaj në pak ditë në Shqipëri. Para pak ditësh, dy turiste nga Belgjika dhe Franca humbën jetën, pasi po ekspoloronin pa një guidë zonën e Valbonës në Theth, duke rënë në greminë.
Ndërkohë po në ditët e fundit, një turist holandez humbi jetën në lumin Osum, pasi e ka marrë rrjedha ku ishte futur për të notuar së bashku me gruan e tij.
Bilanc tragjik për turistët e huaj ishte dhe aksidenti i ndodhur të martën pasdite në Përrenjas, ku humbi jetën një 56-vjeçare me kombësi gjermane.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.