.png)
Gazeta Si – Donald Trump ka urdhëruar Departamentin e Drejtësisë që ndalon zbatimin e një ligji amerikan kundër korrupsionit, i cili nuk i lejon amerikanët t’u japin ryshfet zyrtarët e qeverive të huaja për të përfiituar biznes.
“Do të thotë shumë më tepër biznes për Amerikën”, – tha presidenti në Zyrën Ovale pas nënshkrimit të një urdhri ekzekutiv të hënën që udhëzon Pam Bondi-n, Prokuroren e Përgjithshme të SHBA-ve, të ndalojë zbatimin e Aktit të Praktikave të Huaja Korruptive të vitit 1977. “Tingëllon mirë në letër, por në [praktikë] është një fatkeqësi”, – tha Trump për FCPA.
“Kjo do të thotë që nëse një amerikan, shkon në një vend të huaj dhe fillon të bëjë biznes atje ligjërisht, legjitimisht ose ndryshe, është pothuajse një hetim, aktakuzë e garantuar dhe askush nuk dëshiron të bëjë biznes me amerikanët për shkak të këtij ligji”.
Një zyrtar i Shtëpisë së Bardhë tha se “siguria kombëtare e vendit varet nga Amerika dhe kompanitë e saj që fitojnë avantazhe strategjike tregtare në mbarë botën”.
Zyrtari shtoi: “Presidenti Trump po ndalon zbatimin e tepruar dhe të paparashikueshëm të FCPA-së që i bën kompanitë amerikane më pak konkurruese”.
Urdhri shënon një nga politikat më të guximshme të zbatimit të lëshuara nga administrata Trump, duke minuar potencialisht një mjet kritik në goditjen e sjelljes së keqe individuale dhe të korporatave.
FCPA ka mbështetur disa nga rastet më të profilit të DD-së, duke përfshirë një marrëveshje për pranimin e fajësisë që arriti vitin e kaluar me Trafigura mbi ryshfetet e shtëpisë së tregtimit të mallrave të prodhuara në Brazil për të mbajtur biznesin me kompaninë e naftës “Petrobras” të kontrolluar nga shteti.
Në vitin 2022, një nga ish-partnerët e vjetër të McKinsey u deklarua fajtor për pjesëmarrje në një komplot për të shkelur FCPA në lidhje me një skandal të gjerë korrupsioni gjatë administrimit të ish-presidentit të Afrikës së Jugut, Jacob Zuma.
Tetorin e kaluar, kontraktori amerikan i mbrojtjes RTX, ra dakord të paguante më shumë se 950 milionë dollarë për pretendimet se i kishte dhënë ryshfet një zyrtari të Katarit për të lehtësuar shitjen e armëve në vendin e Lindjes së Mesme dhe mashtroi Pentagonin për të paguar më tepër për armët, duke përfshirë sistemet e raketave “Patriot”.
Vendimi tërhoqi kritika nga ekspertët kundër korrupsionit, të cilët thanë se ndalimi i zbatimit të ligjit do të dëmtonte kompanitë amerikane që operojnë jashtë vendit.
“Shumica e kompanive [SHBA] e vlerësojnë faktin që FCPA u lejon atyre të jenë të vendosur në refuzimin e ryshfeteve, sepse shumica e kompanive të sektorit privat – në mënyrë të arsyeshme – e shohin ryshfetin si një kosto joproduktive”, – postoi Richard Nepheë, një ish-koordinator kundër korrupsionit në Departamentin e Shtetit në platformën “X”.
Zyrtari i Shtëpisë së Bardhë tha se Bondi do të nxjerrë udhëzime të reja për zbatimin që “promovon konkurrencën amerikane dhe përdorimin efikas të burimeve federale të zbatimit të ligjit”, duke shtuar se veprimet e mëparshme dhe ekzistuese të FCPA-së do të rishikohen.
Kompanitë amerikane u dëmtuan nga “zbatimi i tepërt” i aktit, pasi “atyre u ndalohet të angazhohen në praktika të zakonshme midis konkurrentëve ndërkombëtarë, duke krijuar një fushë loje të pabarabartë”, shtoi zyrtari.
Shtëpia e Bardhë tha se siguria kombëtare e SHBA-ve, kërkon avantazhe strategjike në asete të ndryshme të infrastrukturës, të tilla si mineralet kritike dhe portet e ujërave të thella.
Prokuroritë e FCPA-së, kishin imponuar “një kosto në rritje për ekonominë e vendit tonë”, tha zyrtari, duke përmendur 26 veprimet e zbatimit në lidhje me ligjin e paraqitur nga departamenti i drejtësisë dhe Komisioni i Letrave me Vlerë vitin e kaluar.
Ata që kryenin dhjetëra veprime të zbatimit çdo vit, shpenzonin burimet nga kompanitë dhe nga zbatimi i ligjit, tha zyrtari. Tridhjetë e një kompani ishin nën hetime të lidhura me FCPA në fund të vitit 2024, shtuan ata.
KSHZ krijoi një njësi të specializuar në vitin 2010 për të forcuar zbatimin e FCPA-së, të cilën e kishte përshkruar si një “fushë me prioritet të lartë”.
Vitin e kaluar, rregullatori akuzoi një ish-ekzekutiv në “Azure Poëer Global”, një kompani e burimeve të rinovueshme në zemër të një rasti që akuzonte miliarderin indian Gautam Adan për kryerjen e një skeme ryshfeti. DD ngriti gjithashtu një aktakuzë penale.
Azure tha se ish-punonjësit e përmendur në akuza ishin “të ndarë” nga ajo për më shumë se një vit. “Adani Group” i quajti akuzat “të pabaza”. Ekspertët ligjorë kanë argumentuar se çështja, e cila u ngrit përpara kthimit të Trump në Shtëpinë e Bardhë, mund të varet nga presidenca e tij. DD nuk iu përgjigj menjëherë një kërkese për koment.
Burimi: “Financial Times”; Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
