.png)
Një i ri është arritur të shpëtohet pas një pune të pandërprerë për asnjë sekondë, diku rreth orës 14.32, mbi 10 orë pasi ishte bllokuar në rrënojat e vilës së tij, në zonën e ish-Kënetës, në Durrës. Të gjithë ata që merrnin pjesë në aksion, por edhe të njohur dhe të afërm të tij, më në fund kanë marrë frymë lirisht ...
Një prej tragjedive më të mëdha të tërmetit 6.4 Rihter që goditi Shqipërinë në orët e para të mëngjesit të kësaj të marte me gjasë u konsumua në zonën e ish-Kënetës. Skena ishte një vilë trekatëshe e ndërtuar në këtë zonë, ku dyshimet ishin se zuri brenda 8 pjesëtarë të një familjeje.
Goditja e fortë e tërmetit e anoi ndërtesën, por nuk e rrëzoi plotësisht atë. Kjo pengoi grupet e shpëtimit dhe të zjarrfikësve që mbërritën me vonesë në këtë zonë edhe për shkak të rrugëve të ngushta.
Deri rreth orës 9:30 minuta grupet e emergjencës nuk ishin në gjendje që të përcaktonin nëse në banesën gjysmë të shembur kishte të mbijetuar apo jo. E vetmja e dhënë që ata siguruan ishte nga të afërmit dhe fqinjët e tjerë që thanë se para lëkundjes së tokës në shtëpi kanë qenë të paktën 7 persona.
Kjo u konfirmua rreth orës 10:00, kur zëri i një djali të ri, që mendohet rreth 17 vjeç kërkoi ndihmë nga brenda banesës gjysmë të shembur. Gjatë komunikimit me të, grupet e emergjencës konfirmuan se në ndërtesë në momentin e tërmetit ndodheshin 7 persona. Por, i riu nuk ishte në gjendje të dallonte asnjërin prej tyre afër vetes.
Ai konfirmoi vetëm që në momentin që pjesë të strukturës i kanë zënë poshtë ndodheshin në katin e dytë të vilës, në përpjekje për të dalë jashtë së bashku me një të moshuar, një të paralizuar dhe katër fëmijë të mitur bashkë me nënën e tyre.
Grupet e emergjencës arritën që t’i fusnin ujë të riut përmes një tubi plastik dhe pasi vlerësuan situatën e godinës sërish nuk ndërhynë për shkak të rrezikshmërisë së lartë që shtëpia të shembej nga momenti në moment.
Fatkeqësisht kështu ndodhi! Shtëpia u shemb plotësisht rreth orës 10:30 minuta dhe që pas këtij momenti askush nuk ishte më në gjendje që të dëgjonte më zërin e të riut, duke shkaktuar ankth dhe frikë për më të keqen. Por fatmirësisht pas rreth 30 minuta ankthi zëri i djalit u dëgjua sërisht!! Ishte një zë shprese.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
