Gazeta Si – Mesfushori ka pranuar shitjen në Premier Ligë. Për të është gati një kontratë 8 milionë euro, plus 2 milionë bonuse nga Njukasëlli.
Sandro Tonali është gati të lërë Milanin, nëse klubi kuqezi saktëson edhe detajet e fundit me drejtuesit e Njukasëllit. Lojtari ka pranuar të lërë skuadrën, për të cilën ka bërë tifo gjithmonë, përballë një oferte shumë të mirë, që Milani as që mund t’i afrohet.
Bisedimet janë në hapat e fundit, diferenca është shumë e vogël mes ofertës 70 milionë euro plus 5 bonuse të Njukasëllit dhe 80 milionë eurove të kërkuara nga Milani për numrin 8. Orët e fundit bisedimet janë shpejtuar, me kontakte të shpeshta me agjentin e futbollistit për të përcaktuar detajet e ofertës së majme.
Championsin e ardhshëm Tonali mund ta luajë me fanellën e Njukasëllit, me një kontratë të pasur shumëvjeçare në xhep. Një lamtumirë e detyruar nga Milani, që në fillim rezistoi përballë ofertës së parë prej 60 milionësh. Tani anglezët janë afër 80 milionëve të kërkuar, ndërkohë që i ofrojnë mesfushorit më shumë se dyfishin e pagës që ka marrë te kuqezinjtë.
Milani ndërkohë po mendon për Fratezin e Sasuolos si zëvendësues, si dhe po ndjek me interes pistën e talentit turk Arda Guler.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.