.png)
Gazeta Si – Një fund kampionati i mbushur me emocione dhe dramacitet. Titulli kampion do të vendoset javën e fundit, por barazimi i sotëm i Tiranës, 2-2 me Bylisin, bën që gjithçka të jetë në dorë të Partizanit. Mjafton që të kuqtë të mundin Teutën në javën e fundit dhe shpallen kampionë të Shqipërisë.
Partizani mundi sot 1-4 Kastriotin. U gjend në vështirësi, pasi pësoi gol në fillim të ndeshjes, kur krutanët shënuan me Grecën. Megjithatë, skuadra e kuqe përmbysi shpejt gjithçka me të zakonshmit Rrapaj dhe Viktor da Silva. Braziliani shënoi edhe një gol në pjesën e dytë, ndërsa para tij Murataj kishte trefishuar shifrat, kurse Sotës iu anulua një gol.
Në javën e fundit Partizani ndeshet me Teutën, që ka pretendime për Europën. Do të jetë një sfidë e fortë, por kuptohet që më të motivuar janë kryeqytetasit, tashmë me njërën dorë te titulli.
Tirana pothuajse ka hedhur poshtë punën e gjithë sezonit me barazimin e sotëm në Rrogozhinë ndaj Bylisit. Dy pikët e lëna kanë kosto të lartë për kampionët në fuqi. Hila e kaloi Tiranën dy herë në avantazh, por në të dy rastet Bylisi barazoi. Në rastin e dytë mes shumë polemikash për një penallti të dhënë kundër Tiranës, që protestoi e gjitha në fushë.
Vllaznia nuk shkoi më shumë se barazimi 1-1 ndaj Laçit dhe rrezikon shumë të mbetet jashtë Europës, pasi mban vendin e 5-të dhe javën e fundit luan me Bylisin në Ballsh. Teuta mundi 1-0 Egnatian, që tashmë e ka siguruar Europën dhe mendon për finalen e Kupës së Shqipërisë ndaj Tiranës.
Kukësi do të qëndrojë edhe disa ditë me ankthin e mbijetesës, sepse sot nuk mundi të fitonte ndaj Erzenit. Gjelbërim Taipi humbi një penallti në këtë ndeshje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
