Tirana mes qyteteve më të lira dhe më me stil në Europë

Nga Gazeta Si- “Të gjithë e dimë se nuk ka gjasa të gjejmë një ofertë të mirë kur vizitojmë vende të njohura si Parisi ose Venecia, por është ende e mundur të shijosh një pushim në një qytet europian pa shpenzuar shumë para”. Kështu e nis artikullin “Escape” për vendet ku mund të maksimizosh argëtimin me shpenzime minimale, ku mes tyre është edhe Tirana.

“Shqipëria është shndërruar në destincionin e radhës për pushimet në plazhet europiane dhe kryeqyteti i saj, Tirana, ofron vlera të shkëlqyera dhe pamje interesante. Me përzierjen e arkitekturës osmane, sovjetike dhe moderne, duke përfshirë Bunk’Art 1, një bunker i Luftës së Ftohtë i shndërruar në muze arti bashkëkohor, ajo ka një horizont që të hap sytë”, shkruan Escape.

Për sa i përket ngrënies, thuhet në artikull, Tirana ofron shumë mundësi të përballueshme: një vakt mund të kushtojë rreth 20 dollarë, një birrë afër 4 dollarëve, dhe ka edhe një mori verërash që janë në zhvillim, ku Kallmet është një verë e kuqe që ia vlen ta provoni, rekomandon ‘Escape’.

Në artikull përmenden edhe shëtitjet nëpër bare në Bllok, duke i cilësuar si një zbavitje argëtuese. “Merrni teleferikun për në malin e Dajtit dhe vizitoni qytetin e afërt të Durrësit (nën 40 km) në vijën bregdetare me ngjyrë të kaltër të vendit”, përfundon artikulli për Tiranën.

Vendet e tjera të përmendura janë Porto- Portugali, Vilnius- Lituani, Athinë- Greqi, Bukuresht- Rumani, Sofje- Bullgari, Lille- Francë, Riga- Letoni, Budapest- Hungari.