Gazeta Si – Ka mjaftuar një gol i Kristal Abazajt në fundin e pjesës së parë, që Tirana të festojë në Shkodër dhe ta thellojë në 8 pikë diferencën me Partizanin e vendit të dytë. ‘Klasikja’ është fituar 0-1 nga kryeqytetasit, Vllaznia nuk po arrin të dalë nga kriza as me trajnerin Sedloski.
Abazaj shënoi golin e vetëm të ndeshjes pas një sulmi të shpejtë të Tiranës, i ndihmuar edhe nga shtylla dhe një devijim i Bulatoviç. Sulmuesi po rezulton vendimtar për Tiranën ndeshjet e fundit. Kujtojmë që ai vjen pas dopietës me Egnatian një javë më parë.
Në anën tjetër, Bekim Balaj, i ardhur më shumë bujë te Tirana në merkaton e dimrit, ka zhgnjyer deri tani. Ish-sulmuesi i Kombëtares ka shënuar vetëm një gol me penallti. Po ashtu, as Liridon Latifi nuk po arrin të bëhet faktor te shkodranët. Në ndeshjen e sotme ata patën pretendime edhe për një penallti, pas një rrëzimi të Çobës në zonë.
Vllaznia me këtë humbje e komplikon jo pak rrugën për në Europë nga kampionati. Laçi është afruar, po ashtu edhe Teuta, ndërsa Egnatia mbetet një tjetër kërcënim për shkodranët.
Në ndeshjet e tjera të javës së 30-të që u luajtën sot, Teuta fitoi 2-0 derbin me Erzenin, kurse Laçi barazoi 1-1 me Egnatian. Drejtuesit e Partizanit, të pranishëm në “Loro Boriçi”, shpresonin në një ndalesë të Tiranës dhe rihapjen e garës, por dëshira e tyre nuk u realizua.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.