Gazeta Si – Tirana dhe Teuta janë dy skuadrat e para gjysmëfinaliste të Kupës së Shqipërisë. Ato janë kualifikuar sot, duke nxjerrë jashtë gare nga ky kompeticion Kastriotin dhe Kukësin.
Tirana barazoi 2-2 sot ndaj Kastriotit, por falë fitores 1-4 në ndeshjen e parë u kualifikua. Hasani me penallti dhe Najdovski shënuan golat për skuadrën e Shehit në pjesën e parë. Në të dytën krutanët barazuan me një autogol të Isenit dhe golin e Ajazit me penallti. Në ndeshjen e sotme trajneri Shehi kurseu disa nga titullarët, duke u dhënë hapësirë djemve të rinj.
Teuta u mund 2-1 në Kukës, megjithatë ia doli të kualifikohet për në gjysmëfinale, pasi ndeshjen e parë e kishte fituar 2-0. Gruda shënoi për durrsakët, ndërsa për Kukësin realizuan golat e përmbysjes Rashiti dhe Gjelbërim Taipi. Por kaq nuk mjaftoi që Kukësi të kalonte më tej.
Dy skuadrat e tjera gjysmëfinaliste do të përcatohen ditën e mërkurë nga sfidat Laçi-Egnatia dhe Partizani-Vllaznia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.