Gazeta Si – Vlora është një tjetër qytet i përzgjedhur nga qeveria dhe Federata Shqiptare e Futbollit për të investuar për stadiumin e ri. Por në këtë moment klubi i Flamurtarit dhe FSHF nuk kanë një marrëdhënie të mirë.
Me anë të një deklarate zyrtare, klubi vlonjat ka bërë me dije se më 6 maj, kur do të shpallet fituesi i projektit ‘Vlora Sport’, do të refuzohet pjesa kur në dëgjesë do të referojnë përfaqësuesit e FSHF-së. Një formë proteste kjo për atë që vlonjatët e quajnë teatër absurd i FSHF-së.
“Ditën e shtunë, më 6 maj 2023, në teatrin ‘Petro Marko’, në një dëgjesë publike shpallet projekti fitues i ‘Vlora Sport’. Flamurtari, gjatë dëgjesës refuzon të jetë bashkëdëgjues në momentin kur do të referojnë të deleguarit e Federatësë Shqiptare të Futbollit.
Kjo formë civile e protestësë vjen mbas penalizimeve të njēpasnjëshme ndaj klubit, ku rasti më i fundit është mbyllja e stadiumit deri në fund të sezonit me vendimin arbitrar për të mbajtur jashtë stadiumit sportdashësit vlonjatë. Refuzojmë teatrin absurd të Federatës Shqiptare të Futbollit”, - shkruhet në deklaratë.
Flamurtari ishte një nga tri skuadrat që pretendonin ngjitjen në elitë këtë sezon, por nuk ia doli të renditet në dyshen e parë të Kategorisë së Parë. Vlonjatët kanë rezerva për FSHF-në, për mënyrën si arbitrat e kanë trajtuar skuadrën e tyre. Flamurtari megjithatë ka edhe një shans për t’u ngjitur në Superiore me anë të ‘play-off’-it.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.