.png)
Gazeta Si - Pas sulmit kibernetik ndaj shërbimeve online qeveritare disa ditë më parë, është rikthyer shërbimi në portalin e-Albania.
Të gjithë qytetarët që duan të shkarkojnë dokumente tashmë, portali e-Albania i është rikthyer normalitetit.
Sipas një njoftimi, e-Albania është rikthyer në funksion për 1118, nga 1225 shërbimet elektronike.
Shërbimet publike online dhe faqet qeveritare u mbyllën përkohësisht për shkak të një sulmi kibernetik të sinkronizuar dhe të sofistikuar nga jashtë Shqipërisë.
LEXO EDHE:
- Sistemet e shërbimeve jashtë funksionit, kush qëndron pas sulmeve kibernetike në Shqipëri?
- Sulmi kibernetik u detektua të premten, Qeveria: E njëjta metodë që është përdorur kundër sistemeve në Ukrainë
- e-Albania jashtë funksionit, AKSHI: Po përballemi me sulme kibernetike nga jashtë vendit
“Tashmë mund të gjenerohen sërish nga platforma digjitale: Dokumentet me vulë elektronike – certifikatat e gjendjes civile, vërtetimet tatimore, eksteraktet dhe certifikata e regjistrimit të biznesit, vërtetimet e papunësisë, certifikata e gjendjes gjyqësore (dëshmia e penalitetit). Do të mund të aplikohet për: Regjistrimin në klasën e parë dhe të dhjetë të nxënësve; Shërbimet e regjistrimit të biznesit, etj”, - thuhet në një njoftim.
Por për të gjithë qytetarët shqiptarë që jetojnë jashtë kufijve të Shqipërisë, portali e-Albania, për arsye të larta sigurie, do të bëhet funksional së shpejti.
Sipas Kryeministrisë, AKSHI së bashku me skuadrën e Microsoft DART (Detection and Response Team) dhe partnerët e “Jones Group International”, po vijojnë punën me intensitet të plotë për t’ju kthyer qytetarëve edhe:
Shërbimet e regjistrimeve dhe të ndryshimeve të pronarëve përfitues;
Vërtetimin e ndihmës ekonomike, pagesës së paaftësisë së kufizuar dhe kërkesës për të përfituar nga programet e strehimit social;
Për shërbimet e rezervimit të takimit për kryerje konsulte e ekzaminimi mjekësor;
Për listën e notave dhe vërtetimin e diplomës për studentet që kanë ndjekur Universitetin e Tiranës;
Për shërbimet konsullore, për shqiptarët jashtë vendit;
Shërbimet e certifikatave të regjistrimit të objekteve të pronësisë industriale;
Njehsimin e diplomave dhe certifikatave të lëshuara nga institucionet e huaja;
Si dhe për kryerjen e pagesave të ujit dhe energjisë elektrike.
“Duke falënderuar edhe një herë çdo qytetar, biznes, punonjës administrate, shtetas të huaj në Republikën e Shqipërisë, për durimin, kërkojmë mirëkuptimin në rast të ndonjë problemi me të cilin mund të hasemi, përgjatë këtij procesi e kësaj kundërofensive ndaj sulmit kibernetik, që s’ishe parë ndonjëherë më parë në vendin tonë. Sigurojmë edhe një herë gjithë qytetarët shqiptarë se do të vijojmë punën deri në rikthimin në funksion të plotë të çdo shërbimi”, thuhet në një njoftim të zyrës së shtypit të Kryeministrisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
