Studimi: Burrat mund të marrin një kontraceptiv të ri jo-hormonal

Burrat mund të marrin një kontraceptiv të ri jo-hormonal për të cilin një studim i ri ka thënë se është "99 për qind efektiv në parandalimin e shtatzënisë”. Eksperimenti është krijuar tek minjtë dhe nuk ka pasur efekte anësore të dukshme. Studimi, i cili u prezantua në një takim të Shoqatës Amerikane Kimike (ACS) të enjten, mund të zgjerojë potencialisht metodat e kontrollit të lindjes tek burrat, të cilat aktualisht përfshijnë vetëm dy opsione efektive - prezervativët për meshkuj dhe vazektominë(një formë e kontrollit të lindjes dhe parandalon lëshimin e spermës gjatë derdhjes).
"Shkencëtarët janë përpjekur për dekada të tëra për të zhvilluar një kontraceptiv oral efektiv mashkullor, por ende nuk ka pilula të miratuara në treg," tha në një deklaratë Abdullah Al Noman, një student i diplomuar në Universitetin e Minesotës.
Shumica e kontraceptivëve mashkullorë që aktualisht po i nënshtrohen provave klinike synojnë testosteronin e hormonit seksual mashkullor, thanë shkencëtarët, duke shtuar se kjo mund të çojë në efekte anësore si shtim në peshë, depresion dhe rritje të niveleve të "kolesterolit të keq" të lipoproteinës me densitet të ulët (LDL).
"Pilula femërore ka qenë e disponueshme për 60 vjet tani, por studimet për një pilulë për meshkujt kanë mbetur mbrapa," tha Gunda Georg, Shef i Departamentit të Kimisë Mjekësore në Universitetin e Minesotës.
Kontraceptivi eksperimental synon një proteinë të quajtur receptori alfa i acidit retinoik (RAR-α), që lidh acidin retinoik, një formë e vitaminës A. Ky i fundit thanë shkencëtarët, luan rol të rëndësishëm në rritjen e qelizave, diferencimin – duke përfshirë formimin e spermës – dhe zhvillimin embrional.

Struktura kimike e kontraceptivit.Marrë nga "The Independent"

Ndërsa kërkimet e mëparshme çuan në një përbërës oral që frenonte të tre anëtarët e familjes RAR (RAR-α, -β dhe -γ), duke funksionuar te minjtë meshkuj, studimi i ri donte të gjente një ilaç specifik për RAR-α me më pak efekte anësore. Shkencëtarët ekzaminuan nga afër strukturat e proteinave RAR-α, -β dhe -γ të lidhura me acidin retinoik dhe identifikuan ndryshime strukturore në mënyrën se si tre receptorët lidhen me të. Bazuar në këtë analizë, ata projektuan dhe sintetizuan rreth 100 përbërës dhe vlerësuan aftësinë e tyre për t'u lidhur në mënyrë selektive me RAR-α në qeliza. Ata gjithashtu monitoruan peshën, oreksin dhe aktivitetin e përgjithshëm të minjve dhe nuk gjetën ndonjë efekt anësor të dukshëm. Rreth një muaj pasi minjtë nuk morën medikamentin ata ishin seksualisht aktiv.
“Për shkak se mund të jetë e vështirë të parashikohet nëse një përbërës që duket i mirë në studimet e kafshëve do të dalë edhe në provat njerëzore, ne aktualisht po eksplorojmë edhe komponime të tjera”, tha Georg.
Studiuesit, të cilët morën fonde nga Instituti Kombëtar i Shëndetit dhe Iniciativa për Kontraceptivët e meshkujve dhe po punojnë me një kompani të quajtur YourChoice Therapeutics, presin të fillojnë provat tek njerëzit në tremujorin e tretë të vitit 2022.
Burimi: The Independent/ Përshtati: Gazeta “Si”

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.