.png)
Pothuajse është zyrtare. Shefi i ri i Formula 1 do të jetë Stefano Domenikali, 55-vjeçari që ka qenë përgjegjës sportiv i Ferrarit në periudhën 2008-2014 dhe tani president i Lamborghinit. Vendimi pritet të zyrtarizohet, pasi Domenikali e ka arritur tashmë akordin me “Liberty Media”, që prej tre vjetësh administron nëpërmjet “Formula One Group”, e kuotuar edhe në bursë, Formulën 1. Ai do të marrë vendin e Chase Carey, mandati i të cilit përfundon në fund të vitit.
Për Domenikalin është rikthim në një rol të rëndësishëm në automobilizmin sportiv, të cilin në fakt kurrë nuk e ka braktisur. Ai ka kontribuuar vitet e fundit për plotësimin e të gjitha rregulloreve të të gjitha kampionateve, që nga ai i Formula 1 e deri te Formula 4.
Drejtor sportiv dhe më pas krahu i djathtë i Zhan Todt në vitet e arta të Mikael Shumaker, Domenikali ka qenë në krye të Ferrarit gjatë presidencës së Luka di Montexemolo nga viti 2008, kur fitoi titullin e konstruktorëve, deri në sezonin zhgënjyes 2014. Me “regjinë” e tij u bë i mundur kalimi i Fernando Alonsos te skuaderia e famshme italiane.
Me Domenikalin në krye të “Liberty Media”, mbyllet edhe një koincidencë interesante: shumë ish-ferraristë në role drejtuese të Formula 1. Todt numri 1 i FIA-s, Ros Braun shefi sportiv i “Liberty” dhe tani pikërisht Domenikali.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
