Gazeta Si – Ndryshime të rëndësishme në horizont te Dinamo, skuadra e dytë më e titulluar në vend. Pranë klubit me president Adrian Bardhin pritet të afrohen edhe tre sponsorë të tjerë për një projekt ambicioz, që mund të përfshijë edhe emra si Igli Tare, i cili ndoqi nga afër miqësoren e Dinamos në Korçë, bashkë me italianin Luixhi Di Biaxho.
Te klubi kryeqytetas pritet të afrohen biznesmenë të njohur, siç janë kompanitë Mektrin Motors, apo Pelikan e ndonjë tjetër. Sponsor mund të jetë edhe kompania arabe që do të ndërtojë projektin e madh në qytetin e Durrësit, “Durrës Yachts & Marina”.
Dinamo pritet të ndërtojë një kompleks të ri në Durrës dhe më pas të nisë edhe bashkëpunimin me akademinë e Mançester Sitit. Kujtojmë që vetëm pak kohë më parë u nënshkrua një marrëveshje bashkëpunimi me markën e njohur të futbollit botëror nga ministrja e Arsimit dhe Sporit, Evis Kushi.
Në gjithë këtë projekt, Igli Tare mund të japë kontributin e tij për ndërtimin e një klubi modern. Më parë u fol se ish-drejtori sportiv i Lacios do të ishte bashkëpunëtor te Partizani, por tani është më afër Dinamos. Dinamo mund të ndryshojë edhe logon dhe të quhet ‘Dinamo City’.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.