.png)
Gazeta Si - Drejtuesit më të lartë të SPAK-ut, të kryesuar nga kryeprokurori i Posaçëm, Altin Dumani, po marrin pjesë në një vizitë studimore në Uashington, DC këtë javë.
Lajmi bëhet me dije nga ambasada e Shteteve të Bashkuara ntë Amerikës në vendin tonë, e cila publikon dhe pamje nga takimet e zhvilluara.
Në fotot e publikuara, mes të tjerëve shfaqen kreu i SPAK-ut Altin Dumani dhe ish-drejtuesi i kësaj prokurorie, Arben Kraja, i cili ka marrë në dorë hetimin e aferës së privatizimit të klubit sportiv “Partizani”, ku nën hetim është edhe ish-kryeministri Sali Berisha.
Mes prokurorëve që ndodhen në SHBA, është edhe Enkelejda Millonai, e cila po heton edhe ajo çështjen ndaj Berishës dhe kërkoi detyrim paraqitje dhe ndalim për daljen jashtë vendit të ish-kryeministrit.
“Të udhëhequr nga anëtarët e ekipit të Zyrës për Zhvillimin, Ndihmën dhe Trajnimin e Prokurorisë Jashtë Vendit të Ambasadës së SHBA në Tiranë (OPDAT), zyrtarët e SPAK-ut u takuan me drejtuesit kryesorë të Departamentit të Drejtësisë nga OPDAT dhe Programit Ndërkombëtar të Ndihmës për Trajnimin për Hetimet Penale (ICITAP)”, - thuhet në një njoftim të ambasadës amerikane në Tiranë.
Sipas saj, Prokurorët e SPAK diskutuan gjithashtu sfidat e sigurisë me Shërbimin Marshall të Shteteve të Bashkuara, i cili mbron gjyqtarët, prokurorët, stafin e gjykatës dhe dëshmitarët federalë të Amerikës.
Ambasada thekson vizita do të përfshijë gjithashtu takime me Departamentin e Shtetit të SHBA-së, Departamentin e Drejtësisë, Administratën kundër Narkotikëve (DEA) dhe Byronë Federale të Hetimit (FBI).
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
