.png)
Gazeta Si – Përmes një shkrese, SPAK i ka konfirmuar KQZ-së dënimin e kryebashkiakut të Kuçovës, Kreshnik Hajdari për të vendosur nëse do t’i ndërpritet ose jo mandati sipas ligjit.
Shkresa me firmën e Klodian Brahos, kreut të SPAK, i drejtohet Komisionerit Shtetëror për Zgjedhjet, Ilirjan Celibashi, ku i bën të ditur se vendimi ndaj Hajdarit ka marrë formë të prerë, madje është nxjerrë edhe urdhri për ekzekutimin e dënimit.
Në dokumentin zyrtar, Prokuroria e Posaçme sqaron se procedimi penal ndaj Kreshnik Hajdarit është regjistruar me numrin 80, më datë 3 maj 2023, për veprën penale “Falsifikimi i vulave, stampave ose formularëve”.
Sipas SPAK, pas përfundimit të hetimeve paraprake, çështja është dërguar për gjykim më 18 dhjetor 2023. Më pas, Gjykata e Posaçme e Shkallës së Parë për Korrupsionin dhe Krimin e Organizuar, me vendimin nr.06 të datës 25 janar 2024, e ka deklaruar fajtor Hajdarin.
Prokuroria i kërkon KQZ-së të marrë në shqyrtim informacionin e përcjellë, ndërsa çështja pritet të vijojë me zhvillime të mëtejshme dhe do të jetë pikërisht kjo e fundit që do vendosë për mandatin si kryebashkiak të Hajdarit, nëse do ndërpritet apo jo, kur jemi një vit para zgjedhjeve lokale të ardhshme.
Më herët, ka qenë ish-deputeti opozitar dhe kandidati për Bashkinë e Kuçovës në zgjedhjet e vitit 2023, Lefter Maliqi, ai që e ka denoncuar Hajdarin disa herë, përfshi edhe çështjen e dënimit në Greqi, duke kërkuar ndërprerjen e mandatit të tij si kryebashkiak.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje