.png)
Gazeta Si – SPAK i ka kërkuar Kuvendit dhënien e autorizimit për arrestimin e ish-zv/kryeministrit dhe deputetit socialist, Arben Ahmetaj për aferën e inceneratorëve.
Ahmetaj dyshohet të ketë kryer korrupsion në 6 raste, ku ndaj tij rëndojnë 3 akuza: fshehje e mosdeklarim pasurie dhe pastrim parash.
SPAK kërkon leje nga Kuvendi edhe për t’i ushtruar atij një kontroll në banesën e tij personale apo tabulatet telefonike.
Ai është zyrtari më i lartë që përballet me kërkesën për arrestim në tri dekadat e fundit në Shqipëri dhe i pari ish-zv.kryeministër që pritet të arrestohet.
Kryeparlamentarja Lindita Nikolla, pas shkresës së dërguar në Kuvend për heqjen e lirisë së Ahmetajt, do të thërrasë të martë, 11 korrik mbledhjen e Këshillit të Mandateve që do të japë autorizimin.
Ish-ministri Ahmetaj mund të vijë e të flasë, duke e kundërshtuar, ose të heqë dorë nga mandati dhe thjesht këshilli certifikon kërkesën e SPAK-ut.
Shembulli më korruptiv dhe flagrant lidhet me gjurmët e mbetura në kompjuterin e Klodian Zotos, një i kërkuar dhe i akuzuar për inceneratorët, i cili dyshohet se i pagoi udhëtime në disa shtete, atij dhe bashkëshortes. Pesë rastet e tjera të korrupsionit mbahen sekret nga SPAK, pasi ka edhe persona të tjerë nën hetim.
Në letër-porositë e ndërkombëtarëve por edhe llogaritë bankare SPAK thotë se nga udhëtimet , Arben Ahmetaj përfitoi 34 mijë euro.
Ish-ministri i Financave dëshmoi për rreth 6 orë në SPAK në 22 qershor. Deputeti nuk ka pranuar të japë asnjë shpjegim për mediat, përsa i përket deklarimeve që ka dhënë përballë prokurores.
Ish-zyrtari i lartë socialist akuzohet për 3 vepra penale: korrupsion, mosdeklarim të pasurisë dhe pastrim parash.
Fillimisht, Prokuroria hetoi rolin e tij në inceneratorin e Elbasanit, për akuzën e “Shpërdorimit të detyrës”, e cila tashmë ka rënë pë mungesë provash.
Më herët, njerëzve të afërt të ish-ministrit të Financave iu sekuestruan 2 vila, me dyshimet se posedohen në mënyre indirekte prej tij.
Ndërkohë në sitën e SPAK janë duke kaluar të gjitha pasuritë në emër të Ahmetajt dhe të familjarëve të tij.
Ish-ministri ka zhvilluar një betejë në të 3 shkallët e gjyqësorit për kontrollin e ushtruar në vilën në Hamallaj të bashkëjetueses së tij.
Por Gjykata e Lartë e ka rrëzuar rekursin e tij me argumentin se kontrolli nga SPAK ishte i ligjshëm.
Organi i akuzës ka sekuestruar një sërë dokumentesh në të dyja vilat, të cilat mund t’i shërbejnë hetimit.
Ish-zëvëndëskryeministrit, me vendim të Gjykatës së Posaçme të Apelit, iu refuzua heqja e sekuestros së këtyre dy vilave, që ndodhen në Hamallaj dhe në jug.
Ajo në Hamallaj është në pronësi të bashkëjetueses Erjola Hoxha, ndërsa tjetra, në emër të një vajzë e cila jeton jashtë vendit dhe që është mikeshë me ish-bashkëshorten e Ahmetajt.
Më herët Arben Ahmetaj i ka mohuar akuzat e SPAK për të dyja procedimet të cilat po hetohen si një çështje e vetme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
