Muzike

Skënderbeu bashkon edhe pas 550 vitesh (foto)

Duket se 550 vjet më vonë, Gjergj Kastrioti Skënderbeu e përcjell mesazhin që la si amanet në shtratin e vdekjes, “Të bashkuar, edhe pa mua, do të fitoni.” Të paktën në botën e artit, ku këngëtarë, balerinë, instrumentistë janë bërë bashkë në koncertin e mbajtur në Vatikan, mbrëmjen e 19 nëntorit, në kuadër të kremtimeve të vitit jubilar të Skënderbeut , me moton “Bashkuar në muzikë në kujtim të Skënderbeut”. Edhe pse për këtë bashkim ishte nismëtar Papa Françesku, për të nderuar “Atletin e Krishtit” , në këtë vit, të cilin shteti shqiptar ia ka kushtuar prijësit legjendar, që duke luftuar Perandorinë Osmane, pengoi shtrirjen e mëtejshme të saj në Perëndim, duke mbrojtur kështu botën e krishterë, përtej detit…


Ermal Meta, Elhaida Dani, sopranoja Inva Mula, Dua Lipa, Olen Cesari, Kledi Kadiu, Genc Tukiçi, Ramë Lahaj, Eno Peçi, Erza Muqolli, Kastriot Tusha e Lorik Cana dhanë spektakël mbresëlënës për të pranishmit, në koncertin që u mbajt në Selinë e Shenjtë. Këngë si “Dua më shumë Shqipërinë” “Dua mëngjeset e majit” apo “Rrjedh në këngë e ligjërime” ndezën atmosferën shqiptare.

Dua Lipa, Ramë Lahaj e Inva Mula

"Eja eja luleborë" e kënduar nga një grup muzikantësh shqiptar si Inva Mula, Rame Lahaj e Dua Lipa në Vatikan pas ceremonisë për Gjergj Kastrioti -Skenderbeu nën organizimin e Papa Francis..

Gepostet von Insajderi am Dienstag, 20. November 2018


Më herët, Papa Françesku priti në një dëgjesë private delegacionin shqiptar, që përbëhej nga përfaqësues të shtetit dhe të klerit fetar, kryesuar nga Kryetari i Kuvendit të Shqipërisë, Gramoz Ruçi. Të pranishëm ishin edhe përfaqësues të kishës italo-arbëreshe, imzot Donato Oliverio dhe imzot Giorgio Gallaro.Bir heroik i një populli të fortë, e quajti Papa Françesku, Gjergj Kastriot Skënderbeut, gjatë fjalës së tij, ndërsa uroi të pranishmit dhe, me mendje, të gjithë shqiptarët atdhe e në vende të tjera të botës, “të cilët, në emër të lidhjeve të lashta të miqësisë e të marrëdhënieve të vazhdueshme, e shohin gjithnjë me dashuri Selinë e Shën Pjetrit”, tha Papa, ndërsa kujtoi se 50 vjet më parë, Shën Pali VI deshi të presë një përfaqësi të shqiptarëve.


“Shqipëria, tokë me histori të lashtë e të lavdishme, është pjesë përbërëse e Evropës dhe përmes traditave të saj më fisnike e më jetësore dokumenton zanafillën e vetë qytetërimit të saj. Sot, kujtojmë e kremtojmë Gjergj Kastriotin Skënderbeun, bir heroik i një populli të fortë e bujar, që mbrojti me guxim vlerat shpirtërore dhe emrin e krishterë, aq sa të meritonte titullin “Athleta Christi”. Me veprat e tij, farkëtoi identitetin kulturor shqiptar, duke u bërë simbol i padiskutueshëm lidhjeje dhe bashkimi kombëtar, si edhe interpretues në nivelin më të lartë i vlerave të besnikërisë së ndershme ndaj impenjimeve të ndërmarra lirisht.”


Në mes të shekullit të XV Gjergj Kastrioti Skënderbeu vendosi marrëdhënie të ndërsjella me Selinë e Shenjtë, në Vatikan, ndërsa këto marrëdhënie kulmuan me Papa Kalistin e III, i cili gjatë papatit të tij trevjeçar organizoi një kryqëzatë kundër turqve, që më 1453-shin kishin pushtuar Konstadinopojën. Roli i heroit kombëtar, Gjergj Kastrioti në ndalimin e përparimit të ushtrisë turke në Europë është i pasqyruar në letërkëmbimin mes tij dhe Papa Kalistit të III. Ishte pikërisht ky papë që i akordoi Skënderbeut titullin “Atlet i Krishtit”.


“Prania, në takimin e sotëm, të një grupi arbëreshësh, pra, italo-shqiptarësh, me traditat dhe shprehjet e tyre gjuhësore përçuar prej shekujsh, na bën të imagjinojmë atmosferën e Shqipërisë së Skënderbeut dhe na konfirmon se heroi kombëtar mbetet urë e vlefshme për ruajtjen e lidhjeve të frytshme të arbëreshëve me tokën e tyre të origjinës”, tha Papa, ndërsa i referohej përfaqësisë së komunitetit arbëresh në këtë dëgjesë të veçantë.

Papa, shtoi më tej, se uron që ky përvjetor të jetë një rast i volitshëm i Shqipërisë në zhvillimin e vërtetë. Duke përkujtuar me mirënjohje shenjtorët martirë, që e dëshmuan fenë me çmimin e jetës, si edhe Shën Terezën e Kalkutës -për të cilën organizoi një koncert në Vatikan dy vjet më parë – Papa Françesku u dha bekimin apostolik të gjithë të pranishmëve dhe popullit shqiptar.

 

Më Shumë