.png)
Nga Gazeta Si - Shuhet në Romë Maurizio Costanzo, gazetar, prezantues televiziv, autor, skenarist. Ai ishte 84 vjeç. Ndarjen nga jeta e bën të ditur zyra e tij e shtypit.
Maurizio Costanzo ishte një gjigant i televizionit italian. Për disa vite ai ishte autori dhe prezantuesi më i rëndësishëm i televizionit italian.
“Maurizio Costanzo Show”, për të paktën një dekadë, u konsiderua si “salloni mediatik” par excellence. Ai ishte një program televiziv mjaft i dashur dhe që frikësonte edhe të famshmit dhe politikanët.
Fillimet mes gazetave dhe muzikës
I lindur në Romë më 28 gusht 1938, Costanzo vendosi të braktisë studimet menjëherë pas shkollës së mesme për të ndjekur ëndrrën e tij të madhe: të bëhej gazetar. Karriera e tij filloi në vitin 1956 si reporter për gazetën “Paese Sera”: ai ishte vetëm 18 vjeç. Pastaj kaloi në “Corriere Mercantile” të Genovas dhe në vitin 1960 u bë kryeredaktor i së përjavshmes “Grazia”.
Debutimi i tij në radio daton në vitin 1963 si autor i programit “Canzoni e nuvole”, drejtuar nga Nunzio Filogamo. Falë një personaliteti të fortë dhe një krijimtarie jo të zakonshme, Costanzo filloi një ngjitje të shpejtë drejt suksesit në ato vite, duke arritur gjithashtu të kontribuonte edhe si tekstshkrues: së bashku me dramaturgun Ghigo De Chiara dhe Ennio Morricone, ai shkroi një nga këngët simbolike të viteve '60, “Se telefonando”, e kënduar nga Mina.
Talk-show e parë
Në vitin 1970 ai drejtoi programin radiofonik “Buon pomeriggio” me sukses të madh, duke inauguruar një fazë vendimtare në karrierën e tij. Në fund të dekadës, në fakt, Costanzo imponoi një formë të paprecedentë argëtimi në televizion: talk show. Së pari me “Bontà loro” (1976-1978), më pas me “Acquario” (1978-1979) dhe më pas me “Grand'Italia” (1979-1980). Pas përvojës së shkurtër të “Fascination”, në 1982 Costanzo lançoi atë që konsiderohet ende modeli i talk-show-ve italianë, “Maurizio Costanzo Show”.
Një program shumë i lakmuar dhe i diskutueshëm, që në thelb ka lançuar personalitete nga bota e argëtimit dhe më gjerë, nga aktorë si Valerio Mastandrea dhe Ricky Memphis e deri te politikanët e ardhshëm si Vittorio Sgarbi. Në atë periudhë Costanzo bëri përpjekjet maksimale në luftën kundër mafies. Një mik i gjyqtarit Giovanni Falcone, ai dogji edhe një bluzë me shkrimin “Mafia made in Italy” në TV live.
Sulmi në ‘93
Më 14 maj 1993, një makinë shpërtheu në Romë, në ‘via Fauro’, pak metra larg Teatrit Parioli, vendi historik i programit, pikërisht kur Costanzo po kalonte me makinën e tij: për fat sulmi mbeti pa pasoja. Më pas Costanzo e konsolidoi famën e tij edhe me programe me audiencë shumë të madhe si “Buona Domenica”, programi i së dielës në Mediaset.
Pikërisht në këtë program, sidomos në prezantimet e tij të fundit, Costanzo ka krijuar një format të lidhur më shumë me protagonistët e reality show-ve dhe kronikës rozë, duke inauguruar një model inovativ.
Costanzo dhe kinemaja, nga Pasolini, Avati te Scola
Megjithatë, gjurmët e tij në historinë e televizionit dhe radios në dekadat e fundit shoqërohen edhe me kontribut në teatër, kinema dhe letërsi: për shembull, ai bashkëpunoi me Pasolinin për “Salò” dhe në skenarët e disa filmave të Pupi Avatit (duke përfshirë “Bordella” dhe “La casa dalle finestre che ridono”) dhe mbi të gjitha te “Una giornata particolare” nga Ettore Scola.
Costanzo si gazetar
Si gazetar, në vitin 1978 ai ishte drejtor i “Domenica del Corriere”, ndërsa një vit më pas u bë themelues dhe drejtor i “L'occhio”, një lloj tabloidi italian që i mbylli ditët e tij në gjykatë për shkak të përfshirjes së botuesit Angelo Rizzoli në një hetim.
Vitet e fundit Costanzo kishte bashkëpunuar si komentator me gazeta dhe radio të shumta kombëtare. Nga viti 1995 deri në vitin 2009 ka qenë profesor në Fakultetin e Shkencave të Komunikimit të Universitetit La Sapienza të Romës. Në vitin 2009, Universiteti Iulm i Milanos i dha atij një diplomë nderi në gazetari, botim dhe multimedia.
Dashuria, gratë dhe fëmijët
Edhe në aspektin romantik Costanzo pati një jetë plot ngjarje: pas tri martesash (me Lori Sammartino, Flaminia Morandi, me të cilën pati dy fëmijë, Camilla dhe Saverio, një regjisor i vlerësuar i filmit, dhe Marta Flavi), dhe një bashkëjetesë të gjatë me Simona Izzo, në vitin 1995 ai u martua me Maria De Filippi, me të cilën adoptoi Gabriele në 2004. /La Repubblica/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
