.png)
Banka e Shqipërisë ka raportuar se banesat në vendin tonë shiten me çmime të negociueshme dhe vetëm në 29% të rasteve shiten me çmimin fillestar.
Tregtuesit pranojnë për BSH-në se 39% e pronave shiten me ulje në intervalet nga 5-20% dhe një pjesë më e vogël mund të shitet me ulje më të madhe, mbi 20%.
Sipas Bankës së Shqipërisë, indeksi i çmimeve të banesave gjatë 6-mujorit të dytë 2020 u rrit me 6.2% krahasuar me gjashtëmujorin e mëparshëm dhe me 11.3% krahasuar me të njëjtën periudhë të një viti më parë. Për Tiranën, çmimet u rritën me 2.3% me bazë gjashtëmujore dhe 8.9% me bazë vjetore.
Monitorimi i Bankës u bë në 230 subjekte ndërtimi apo tregtimi të pasurive të paluajtshme. Në 6mujorin e dytë të vitit 2020, 39% e agjentëve raportuan shitje nga 44% gjatë 6mujorit të parë.
Koha mesatare e shitjes së banesave në vend vlerësohet të jetë mesatarisht rreth 10 muaj. Për Tiranën, subjektet e intervistuara kanë raportuar një kohë mesatare shitjeje prej 9.8 muajsh. Për zonën e Bregdetit dhe për zonat e tjera, koha e shitjes ka mbetur e pandryshuar në përkatësisht 10.6 muaj dhe 11.4 muaj.
BSH raporton se rreth 60% e banesave apo pronave të blera merren me ndihmën e huasë bankare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
