.png)
Nga Gazeta ‘Si’- Kryeministri Edi Rama në fjalën e mbajtur në Samitin IV të Diasporës në Tiranë, tha se vendi ka kaluar një transformim të thellë institucional dhe politik në rrugën drejt integrimit europian.
Ai theksoi se Shqipëria, e cila dikur perceptohej si një vend i “pandëshkueshmërisë”, sot sipas tij është një shtet ku sundon ligji dhe drejtësia funksionon në mënyrë të pavarur, si rezultat i reformave të ndërmarra ndër vite.
Rama nënvizoi gjithashtu progresin në procesin e negociatave me Bashkimin Europian, duke e cilësuar hapjen e grupkapitujve si një arritje të shpejtë dhe të rëndësishme në rrugën e integrimit të vendit në Bashkimin Europian.
Rama vuri në dukje se Shqipëria ka hapur të gjithë grup-kapitujt në një kohë rekord dhe sot ka ambicien të përmbyllë negociatat në 2027-ën.
“Sot pandëshkueshmëria është një mit i të kaluarës në Shqipëri dhe sot Shqipëria është vendi ku askush s’është mbi ligjin dhe drejtësia është e pavarur, siç nuk ka qenë qysh në krye të herës, që nga 1912-ta, deri kur ne me vullnet të plotë i dorëzuam shpatën që i takon vetëm duarve të saj, për të bërë drejtësi të barabartë, për të gjithë, pa kursyer askënd.
Atëherë Shqipërisë i mbyllej rregullisht dera e negociatave për anëtarësim në BE, sot i kemi çelur të gjithë grup-kapitujt, në një kohë rekord, për vetëm 11 muaj.
Njësoj si ju kur ju mbyllej dera në fytyrë në ato hapa të parë në rrugët e botës dhe askush s’kishte kohë, besim, dhe vëmendje, për t’ju dëgjuar dhe kuptuar se sa vlenit, por ju këmbëngulnit, dhe pasi fshihnit lotët nga poshtërimi i ditës, riktheheshit në mëngjes duke qenë në pritje për të qenë gati për derën kur të hapej. Në Samitin e parë, e ardhmja europiane ishte aspirata që mbetej larg, sot është një tryezë ku jemi të ulur bashkërisht, ballë për ballë, me ambicien për të mbyllur negociatat në 2027-ën.
Sot nuk është një kumt dëshiror në ajër, por është një fjalë e përditshme. Shqipëria do të bëhet.
Në gojën e Ismail Qemalit, ajo fjalë nuk ishte një përshkrim, por një besim, që sot si kurrë ndonjëherë ka marrë trajtën konkrete të objektivit të shtetbërjes eropiane”, tha Rama.
Kreu i qeverisë tha se sot vendi ynë ka dy gjëra që sipas tij s’i ka patur kurrë:
“Sot kemi Shqipërinë e besuar nga bota dhe shqiptarët e botës me besimin te Shqipëria”, tha Rama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje