Biznesmeni i ndërtimit, Agron Alushaj, që mbeti i lënduar pas shpërthimit të makinës nga lënda plasëse është transportuar me urgjencë drejt spitalit të Traumës në Tiranë për një mjekim më të specializuar.
Mësohet se transportimi i tij është bërë rreth orës 04:00 të mëngjesit të sotëm (24 nëntor), ndërsa gjendja e tij shëndetësore është kritike për jetën.
Makina në të cilën udhëtonte 48-vjeçari u hodh në erë nga një sasi e konsiderueshme eksplozivi rreth orës 16:35 të pasdites së të premtes, 23 nëntor 2018, në rrugën Transballkanike.
Sipërmarrësi 48-vjeçar, pronar guroresh dhe biznesmen me aktivitet ndërtimi në Vlorë, ka dëmtime të mëdha në të dyja këmbët.
Shpërthimi i fortë ndodhi në momentin kur automjeti po dilte nga një lavazh, ndërkohë që 48-vjeçari ishte në drejtimin e makinës.
Policia ka shoqëruar të gjithë punonjësit e lavazhit dhe ka sekuestruar kamerat e sigurisë, ndërsa në ndihmë të hetuesve të Vlorës janë nisur edhe ekspertë nga Tirana.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.