.png)
Shorti i hedhur nga Presidenti Ilir Meta për përzgjedhjen e 9 anëtarëve të rinj të Këshillit të Emërimeve në Drejtësi kishte vetëm një të njohur, atë që Ardian Dvorani do të ishte sërish anëtar dhe njëkohësisht edhe kryetar i këtij Këshilli edhe për vitin e ardhshëm.
Dvorani ishte i vetmi emër i dorëzuar nga Gjykata e Lartë për pozicionin e një anëtari, që njëkohësisht ligji ja lë po kësaj gjykate edhe postin e kryetarit. Por, interesante ishte zbulimi i goglave për dy anëtarët që dalin nga Gjykata Kushtetuese. Kjo gjykatë kishte dorëzuar katër emra. Vitore Tusha, Fiona Papajorgji, Elsa Toska dhe Marsida Xhaferllari ishin emrat që u vendosën nëpër goglat e hedhura nga Presidenca.
Në fund, goglat zgjodhën Fiona Papajorgjin dhe Vitore Tusha, ndërsa anëtarja e Gjykatës Kushtetuese e kontestuar nga mazhoranca, Marsida Xhaferllari u zgjodh anëtare zëvendësuese.
Ndërkohë, Arta Marku u rizgjodh në këtë pozicion me probabilitetin 1 në 11, si anëtare e Prokurorisë së Përgjithshme, ku zëvendësues goglat përcaktuan Bilbil Metën. Nga prokuroritë e Apelit u zgjodhën Fatjona Memçaj dhe Ludovik Doda. Zgjedhja, si e Markut dhe e Memçajt është një “ngushëllim” për dy kandidatet për kryeprokurore që e humbën garën me Olsian Çelën në Parlament.
Ndërkohë, nga Gjykatat e Apelit u zgjodhën Saida Dollani dhe Miranda Ndoni, ndërsa Arjan Qafa nga gjykatat administrative.
Shorti u hodh pas serisë së akuzave mes Presidentit Ilir Meta dhe kreut të KED-së, Ardian Dvorani për procedurat dhe afatet kohore të ndjekura në rastin e emërimit të gjyqtarëve të Gjykatës Kushtetuese.
E gjithë ceremonia e shortit u hodh në prani të Presidentit Ilir Meta, që ndodhej në mes të Avokates së Popullit, Erinda Ballanca dhe kreut të Këshillit të Lartë të Prokurorisë, Gent Ibrahimi. Procesi u drejtua nga këshilltari juridik i Presidentit, Bledar Dervishi, ndërsa në fund të tij, vetë Meta e vlerësoi përmes një reagimi në rrjetet sociale si tejet transparent procesin dhe kërkoi nga KED-ja e re të njëjtin nivel transparance.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje