.png)
Gazeta Si - Prefektja e Qarkut Fier, Rajmonda Balili nuk është paraqitur në seancë për verifikimin e masës së sigurisë për veprën penale shkelje të barazisë në tendera në dy raste dhe falsifikimi dokumentesh
Balili po hetohet me masën e sigurisë pezullim nga detyra për veprën penale të “shkeljes së barazisë në tendera e kryer në bashkëpunim” në dy raste dhe “falsifikim dokumantash” në kohën kur ushtronte detyrën e kryebashkiakes së Patosit.
Sipas burimeve dyshohet se ajo ndodhet në SHBA dhe masa e sigurimit “pezullim nga detyra” do t’i cakohet kur të kthehet në vendin tonë.
Veç Baliajt, nën hetim janë edhe zyrtarë dhe ish-zyrtarë të tjerë të Bashkisë Patos. Prokuroria e Posaçme kundër Korrupsionit dhe Krimit të Organizuar, ka kryer hetime në kuadër të procedimit penal për veprat penale të “Shkelja e barazisë së pjesëmarrësve në tendera”, e kryer në bashkëpunim, dhe “Falsifikimi i dokumentave”, e kryer në bashkëpunim për dy tendera publikë.
Përkatësisht, “Ndërtim emergjent i murit mbajtës me gabiona dhe gurë në Dukas-Breg, si pasojë e rrëshqitjes së tokës dhe kthimin e rrugës në gjendjen e mëparshme, me fond limit 6,7 milionë Lekë, si dhe “Ndërtim emergjent i murit mbajtës në trupin e rrugës në fshatin Ruzhdie, si pasojë e rrëshqitjes së tokës dhe kthim i rrugës në gjendjen e mëparshme”, në vlerën 8,6 miliardë Lekë.
Pas kryerjes së veprimeve hetimore, me kërkesën e Prokurorisë së Posaçme, Gjykata e Posaçme e Shkallës së Parë për Korrupsionin dhe Krimin e Organizuar, ka vendosur caktimin e masës të pezullimit nga funksionet publike të 4 zyrtareve përshirë prefekten e Fierit, Rajmonda Balilaj, ndërsa 3 punonjës të tjerë të Bashkisë Patos kanë detyrimin e paraqitjes në Policinë Gjyqësore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
