.png)
Nga Gazeta 'Si'-Presidenti i Serbisë, Aleksandar Vuçiç, dhe kryetari i Parlamentit të Serbisë, Vladimir Orliç, njoftuan të mërkurën për shpalljen e zgjedhjeve të jashtëzakonshme parlamentare dhe zgjedhjet lokale në disa qytete dhe komuna, përfshirë në kryeqytetin serb, Beograd.
Zgjedhjet do të mbahen më 17 dhjetor 2023 dhe në krahina.
Me shpalljen e zgjedhjeve, Vuçiç ka shpërndarë Parlamentin serb që u zgjodh më 3 prill 2022.
Paraprakisht, në Parlamentin serb kryeparlamentari, Vladimir Orliç, njoftoi se do të mbahen zgjedhjet për asambletë lokale në 65 qytete dhe komuna.
Gjatë një adresimi të shkurtër, Vuçiç u uroi qytetarëve “zgjedhje të mbara. Ai tha se “ne po jetojmë në kohë të vështira për gjithë botën, në kohën e ndryshimeve globale dhe në të cilën është e nevojshme që të gjithë të jenë të bashkuar për të luftuar në ruajtjen e interesave kombëtare dhe shtetërore”.
“Fushata është një mundësi për të shpalosur ide të ndryshme në mënyrë të civilizuar, për të prezantuar programe, politika që duhet të zbatohen, por të cilat kurrë nuk duhet të kërcënojnë interesat vitale shtetërore dhe kombëtare”, tha Vuçiç.
Ai u uroi të gjithëve “rezultate të mira në zgjedhje” dhe tha se dëshiron që fushata zgjedhore dhe zgjedhjet të mbahen në mënyrë demokratike.
Më 30 tetor, Qeveria e Serbisë i propozoi Vuçiçit që të shpërndante Parlamentin.
Në njoftimin e Qeverisë serbe u tha se mbajtja e zgjedhjeve të reja parlamentare në rrethanat ekzistuese do të sigurojë, veç tjerash, “një nivel të lartë të demokracisë dhe uljen e tensioneve midis medimeve të ndryshme në shoqëri”.
Me shpalljen e zgjedhjeve, fushata parazgjedhore zyrtarisht ka nisur në Serbi.
Nga ana tjetër kjo do të pengojë procesin e negociatave për normalizimin e marrëdhënieve mes Kosovës dhe Serbisë. Takimi i fundit i të dyja palëve u zhvillua në Bruksel me 26 tetor por përfundoi pa asnjë marrëveshje dhe përparim.
Ndërmjetësuesi europian i dialogut, Josep Borrell paralajmëroi edhe një takim të mundshëm të liderëve europianë me kryeministrin e Kosovës Albin Kurtit dhe Vuçiçit. Por zgjedhjet në Serbi duket se do e shtyjnë ata edhe për disa kohë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
