.png)
Kur 57-vjeçari B.K filloi të shfaqte simptomat e para të koronavirusit, vendosi ta merrte ditën pushim dhe u izolua në dhomën e gjumit. Prej ditësh i kishte ikur shija. Paralelisht kishte filluar të shfaqte temperaturë të lehtë, por simptomat erdhën duke u shtuar, duke u shoqëruar me kollë të thatë dhe dhimbje fyti. Pas disa telefonatash me 127-ën, numrin e vënë në dispozicion nga autoritetet për ata që mendojnë se janë infektuar me Covid-19, dyshimet iu konfirmuan edhe nga mjekët.
Ata i premtuan dërgimin e një ambulance për të bërë tamponin dhe i këshilluan të izolohej, por ajo nuk erdhi kurrë. Me kalimin e ditëve, gjendja e 57 vjeçarit u rëndua. Ai është shumë nga pacientët që e kanë kaluar sëmundjen në shtëpi, me mjekime të lehta, por ndryshe nga pjesa tjetër, ai nuk llogaritet në shifrat zyrtare të qeverisë, sepse nuk ka mundur ta bëjë testin.
“Për një javë nuk jam mbushur dot me frymë”, i thotë ai Gazetës Si. “Nata ishte më e keqja. Çdo orë dilja në dritare të merrja frymë sepse bllokohesha. Nga 127-ta më thanë që me siguri kisha koronavirus dhe nëse gjendja përkeqësohej do të më çonin në spital. Fatmirësisht nuk qe nevoja”, thekson ai.
57-vjeçari ka qenë në komunikim të vazhdueshëm më mjekët nëpërmjet telefonit, të cilët e këshillonin ç’duhet të bënte kur kishte vështirësi në frymëmarrje apo kollë të fortë. Por me përkeqësimin e gjendjes, u bë e vështirë që B.K të kujdesej për veten dhe bashkëshortja dhe fëmijët filluan ta ndihmonin, duke “thyer” karantinën e vogël brenda shtëpisë.
“Kisha ethe, dhimbje të forta fyti. Një natë nuk kam vënë gjumë në sy, nuk merrja dot frymë”, rrëfen ai.
Por dy ditë më vonë, 57-vjecari filloi të bëhej më mirë. Javën e dytë të sëmundjes simptomat i ishin lehtësuar i ra temperatura, iu lehtësua dhimbja e fytit dhe iu qetësua kolla. Por shqetësimi i tij ishin bashkëshortja dhe dy fëmijët, të cilët kishin qëndruam prej ditësh në dhomë me të, për shkak të shqetësimit. Në fund të javës së dytë, B.K ndihej, sic thotë ai, ‘njeri tjetër’. Të bindur se ishin infektuar, edhe familjarët ishin në pritje që të “sëmureshin”.
Ka kaluar gati një muaj, por as bashkëshortja e 57-vjeçarit dhe as fëmijët e tij nuk kanë shfaqur asnjë simptomë. Ata nuk e dinë nëse janë infektuar dhe nëse po, a janë shëruar, pasi nuk e kanë bërë tamponin. Edhe pse janë të gjithë në gjendje të mirë shëndetësore, as ai dhe as familjarët e tij nuk kanë dalë nga shtëpia, për të mos rrezikuar të tjerët. Zona ku ai banon, (të cilën Gazeta nuk po e specifikon për të mos rrezikuar zbulimin e identitetit të tij) është një nga vatrat e koronavirusit në Tiranë.
Rasti i 57-vjeçarit dhe i familjes së tij ngre dy pyetje të rëndësishme në përhapjen e epidemisë në vendin tonë: numrin e të infektuarve dhe rastet asimptomatike.
Burime zyrtare nga Ministria e Shëndetësisë, i thanë Gazetës Si, se numri i të infektuarve në Shqipëri mendohet të jetë të paktën më shumë se 3 mijë raste. Një pjesë e të infektuarve nuk shfaqin simptoma, duke e bërë të pamundur identifikimin. Ata cilësohen nga ekspertërt si “hallka e padukshme e zinxhirin epidemiologjik.”
Nëse janë infektuar, familjarët e B.K mund të janë në mesin e këtyre “hallkave”. Nëse 57-vjecari nuk do të shfaqte simptoma, e gjithë kjo familje nga Tirana do të vazhdonte të shkonte në punë, supermarket, apo farmaci, duke ua transmetuar virusin atyre rreth e rrotull. Një i infektuar, ua ngjit virusin 4 ose 5 personave, por jo të gjithë ata arrijnë të izolohen në kohë nga mjekët.
Mjeku i njohur infeksionist Pëllumb Pipero i ka thënë Gazetës Si se në vendin tonë numri i të infektuarve kishte të ngjarë të jetë të paktën 10 herë më i lartë, pasi një pjesë e madhe e të prekurve nuk shfaqin simptoma.
“E kam thënë me dhjetëra herë, madje i pari, që mbas çdo rasti të konfirmuar në rastin më të mirë fshihen 10-15 raste të pa zbuluara”, shprehet Pipero për Gazetën “Si”. “Këto raste nuk kanë manifestime klinike, por sigurisht janë pozitive dhe vazhdojnë të shpërndajnë virusin qetësisht”, thekson ai. Për mjekun e njohur prandaj është edhe jetësor testimi dhe gjurmimi i sa më shumë rasteve kontakti.
Mjekët në vijën e parë të betejës këmbëngulin se mënyra e vetme për izolimin e tyre në kohë është gjurmimi dhe testimi masiv, por ndjekja e kësaj strategjie ka qenë e vështirë jo vetëm në vendin tonë, por në mbarë botën. Deri në momentin që flasim Shqipëria ka 750 të infektuar dhe ka testuar rreth 7 mijë qytetarë. Megjithatë, kjo shifër është e pak më e ulët në krahasim me vendet e tjera në rajon. Në Maqedoninë fqinje, janë bëre rreth 15000 testime dhe janë zbuluar 1400 raste. Edhe pse nuk ka ndonjë provë të drejtpërdrejtë që lidh numrin e të testuarve dhe atyre të viktimave, kurba e epidemisë në vendet e fqinjë ka treguar se rastet rriten kur forcohet kapacitetit i testimit.
Rritja e testeve është duke u cilësuar basti më i mirë në botë për t'i dhënë fund masave të bllokimit të koronavirusit. Vendi ynë ka futur në qarkullim, së bashku me tamponat, edhe testimet seriologjike, për të kuptuar kush ka imunitet ndaj Covid-19 dhe kush jo. "Në fazën e dytë, ne do të dëshironim të zgjeronim testimin në të gjithë vendin për të gjetur ata që janë infektuar sa më shpejt të jetë e mundur dhe ata që kanë formuar imunitet," tha para disa ditësh ministrja e Shëndetësisë, Ogerta Manastilliu.
Deri më tani mungesa e tamponëve ka bërë që Shqipëria të testojë vetëm ata që tregojnë simptoma të rënda të koronavirusit, për këtë arsye ata me simptoma të lehta ose pa simptoma nuk figurojnë në bilancin e të infektuarve. Për të rritur kapacitetin, Bashkimit Europian i ka dhuruar Shqipërisë 20 mijë teste për Covid-19. Kina po ashtu ka dhuruar 5 mijë teste.
Nëse B.K do të kishin filluar të shfaqte simptoma tani, ndoshta ai dhe familja e tij do të kishte mundësi të ishin testuar. Por kjo familje e vogël nga Tirana, është ende në kohë për t’iu nënshtruar testimeve seriologjike, për të kuptuar nëse kanë fituar imunutet apo jo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
