Bota

Rusia lëshon urdhër-arresti për Yulia Navalnaya-n: Putini është një vrasës dhe kriminel lufte

Gazeta Si - Një gjykatë në Moskë ka urdhëruar arrestimin në mungesë të Yulia Navalnaya-s me akuzën e përfshirjes në një grup ekstremist.

Kështu shkruan agjencia Ria Novosti, duke cituar “shërbimin e shtypit të gjykatës”. Gruaja është e veja Alexei Navalnit, disidentit rus që vdiq në burg më 16 shkurt 2024.

Gjykata "zgjodhi një masë parandaluese në formën e paraburgimit për një periudhë 2 mujore. Afati llogaritet nga momenti i ekstradimit në territorin e Federatës Ruse ose nga momenti i ndalimit në territorin rus”, njofton gjykata. Në platformën “X”, Navalnaya tha: "Vladimir Putin është një vrasës dhe një kriminel lufte".

Gjykata sqaroi se Navalnaya ishte vendosur në listën e kërkimit ndërkombëtar, sepse ajo "u fsheh nga autoritetet hetuese".

Gruaja akuzohet për pjesëmarrje në një organizatë ekstremiste. Shërbimi i shtypit i gjykatës i raportoi agjencisë Tass. "Yulia Borisovna u arratis nga hetimi paraprak dhe për këtë arsye është në kërkim", thuhej në një shënim të gjykatës. Akuza ndaj saj dënohet nga 2 deri në 6 vjet burg.

"Oh, a nuk ka një procedurë normale? Një agjent i huaj, pastaj një çështje penale, pastaj një arrestim?!", shkruante e veja e kritikut rus Alexei Navalni në një postim në rrjetet sociale X pas lajmit për urdhër-arrestin e lëshuar kundër saj nga një gjykatë në Moskë. "Kur shkruani për këtë, ju lutem mos harroni të shkruani gjënë kryesore, - shtoi ajo - Vladimir Putin është një vrasës dhe një kriminel lufte. Vendi i tij është në burg, dhe jo diku në Hagë, në një qeli komode me një TV, por në Rusi, në të njëjtën koloni dhe në të njëjtën qeli 2 me 3 metra, ku vrau Alexein".

Navalnaya ndodhet në Gjermani dhe pas vdekjes së bshkëshortit në një burg në Siberi, është zotuar se do të vazhdojë punën e nisur nga ai nga jashtë vendit.


Copyright © Gazeta “Si”


Më Shumë