.png)
Kriza energjetike e shkaktuar nga lufta e Rusisë në Ukrainë mund të shtyjë 141 milionë njerëz në mbarë botën në varfëri ekstreme, sipas një raporti të ri të botuar në revistën Nature Energy.
Studiuesit nga Holanda, Mbretëria e Bashkuar, Kina dhe Shtetet e Bashkuara modeluan ndikimet e rritjes së çmimeve të energjisë në 116 vende dhe zbuluan se shpenzimet e familjeve u rritën deri në 4.8% mesatarisht, pasi çmimet e qymyrit dhe gazit natyror u rritën pas pushtimit rus të Ukrainës, duke shkaktuar një rritje të mëtejshme pas pandemisë.
Në vendet me të ardhura të ulëta, raporti tha se familjet më të varfra, që tashmë përballen me mungesa të mëdha ushqimore, ishin në rrezik më të madh të varfërisë për shkak të kostove më të larta të energjisë. Familjet në vendet me të ardhura më të larta gjithashtu ndjenë ndikimin e rritjes së çmimeve të energjisë, por kishin më shumë gjasa të ishin në gjendje t’i përballonin ato.
Dhe disa vende janë më të ekspozuara se të tjerat. Për shembull, rritja e kostove të energjisë në Estoni, Poloni dhe Republikën Çeke është mbi mesataren botërore, kryesisht për shkak se ato vende mbështeten më shumë në industri që përdorin shumë energji. Polonia në veçanti mbështetej në qymyr për 68.5% të prodhimit të saj të energjisë, që nga viti 2020.
Rritjet e çmimeve të energjisë të shkaktuara nga kriza në Ukrainë, kanë rezultuar gjithashtu në rritjen e kostos së nevojave bazë, si ushqimi. Krahasuar me një vit më parë, në SHBA çmimet e vezëve u rritën me 70.1%.
Kompanitë e mallrave të konsumit thonë se çmimet nuk kanë gjasa të bien së shpejti.
Të enjten, CEO i Nestlé, grupi më i madh ushqimor në botë, u bëri thirrje gjigantëve të tjerë të konsumit si Unilever dhe Procter & Gamble për të paralajmëruar se çmimi i artikujve bazë do të rritet më tej këtë vit.
“Si të gjithë konsumatorët në mbarë botën, ne jemi goditur nga inflacioni dhe tani po përpiqemi të riparojmë dëmin që është bërë,” tha CEO i Nestlé, Mark Schneider ditën e enjte, megjithëse ai nuk pranoi të thoshte se cilat nga 2000 markat e kompanisë do të ndikohen nga rritja e çmimeve.
Në një telefonatë javën e kaluar, shefi financiar i Unilever, Graeme Pitkethly, u tha gazetarëve: “Ne ndoshta kemi kaluar pikun e inflacionit, por nuk jemi ende në çmimet maksimale”. Edhe CEO i Unilever tha se kompania pret që çmimet e ushqimeve të rriten ndjeshëm në vitin 2023.
Sipas raportit, shumë qeveri në mbarë botën kanë ndërmarrë tashmë hapa për të pakësuar ndikimin e rritjes së çmimeve të energjisë tek familjet, nga ulja e taksave të energjisë deri në ofrimin e zbritjeve të faturave të energjisë, si dhe subvencione të energjisë dhe kufizimet e çmimeve.
Por raporti sugjeron se mund të bëhet më shumë, si vendosja e subvencioneve të çmimeve, vendosja e taksave ndaj kompanive të energjisë dhe miratimi i legjislacionit për të përdorur burime më të qëndrueshme të energjisë përgjatë zinxhirëve të furnizimit me ushqime.
Raporti shton se kjo krizë energjetike duhet të shërbejë si një kujtesë për rreziqet e “një sistemi energjetik shumë të varur nga lëndët djegëse fosile”.
Jo vetëm që lë miliona njerëz në prag të varfërisë ekstreme, por gjithashtu përshpejton ndryshimet klimatike, gjë që paraqet më shumë sfida për ata që janë më të rrezikuar nga rritja e çmimeve të energjisë.
Burimi: CNN Business/ Përshtati Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
