Gazeta Si – Pas Getafes dhe Betisit, një tjetër klub spanjoll i elitës kërkon shërbimet e Myrto Uzunit, sulmuesit të Kombëtares shqiptare. Dhe këtë herë bëhet fjalë për një klub prestigjioz si Sevilja, që ka bërë emër edhe në Europë. Një ditë më parë ishte kjo skuadër që eliminoi një emër të madh si Manccester Junajtid nga Liga e Europës.
Golat e shënuar këtë sezon me Granadën në ligën e dytë spanjolle kanë bërë që interesimi për Uzunin të rritet ndjeshëm. Futbollisti beratas është në kulmin e pjekurisë, plotësisht gati për të bërë kapërcimin e madh për të veshur një fanellë më të rëndë se ajo e Granadës.
Nëse kalon te Sevilja, do të ishte pa dyshim një lëvizje shumë e rëndësishme në karrierën sulmuesit kuqezi. Kjo skuadër mban vendin e 13-të aktualisht në La Liga, duke qenë disi larg pozicionit të saj të zakonshëm, por në Spanjë mbetet një nga klubet më të mëdha.
Vetë Uzuni deklaroi pak ditë më parë se kishte oferta nga Spanja dhe Anglia, por pa zbuluar emra. Interesimi i Seviljes për të është zbuluar nga shtypi spanjoll, konkretisht nga ‘todosfichajes.com’.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.