.png)
Gjatë gjithë ditës së sotme, vendi ynë është mbizotëruar nga moti i keq, ulje temperaturash, reshje të dendura shiu dhe dëborë në veri të vendit.
Reshjet e borës kanë përfshirë veriun e vendit si Malësia e Shkodrës, Burreli, Dibra dhe Kukësi, ku bora është shoqëruar dhe me erë të fortë stuhie. Po ashtu reshje bore ka pasur edhe në jug të vendit, kryesisht në segmentin rrugor Korçë-Bilisht-Kapshticë.
Autoriteti Rrugor Shqiptar ka njoftuar se është punuar dhe po punohet për shpëndarjen e kripës dhe pastrimin me borëpastrueset për sigurimin e kalueshmerisë normale në të gjithë akset.
“Gjatë natës gjithë territori është përfshirë nga reshje të dendura, kryesisht në veri ka pasur reshje bore si në: Dibër, Tropojë, Peshkopi, Pukë, Kukës, Shkodër e pjesërisht në Lezhë. Nga ana e kontraktorëve është punuar dhe po punohet për shpëndarjen e kripës dhe pastrimin me borëpastrueset për sigurimin e kalueshmerisë normale në të gjithe akset”, shkruan ARRSH.
Kushtet atmosferike kanë ndikuar edhe në rrjetin elektrik, duke shkaktuar avari, por nga ana tjetër ka vështirësuar punën e brigadave të OSSH për ndërhyrje më të shpejtë.
Megjithatë, masat e marra më herët, në kuadër të emergjencës mjekësore Covid-19, gatishmëria e 2000 punonjësve, me bazë materiale dhe mjete transporti, i dha mundësinë OSHEE të rifuste në punë gjysmën e fiderave të stakuar.
Aktualisht ka një përmirësim të furnizimit në zonat Shkodër, Tropojë, Laç, Tiranë, Fier dhe Vlorë, ndërsa furnizimi me energji elektrike për institucionet e rëndësisë së veçantë vijon normalisht.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
