.png)
Ajo që ishte përfolur prej kohësh në qarqet politike në Romë duket se është bërë realitet. Me një postim ta papritur në Facebook, ish-kryeministri Matteo Renzi njoftoi zyrtarisht lamtumirën nga Partia Demokratike, për të formuar forcën e tij politike, duke krijuar kështu një partie të re që do të konkurronte PD-në.
Ky vendim i shtyrë për një kohë të gjatë duket se rrezikon t’i shkaktojë shqetësime të mëdha qeverisë së re dhe të brishtë të Italisë. Aq shumë saqë Renzi i bëri një telefonatë "miqësore" kryeministrit Giuseppe Conte mbrëmë, duke i komunikuar se: “Unë po largohem nga Partia Demokratike, por mbështetja për qeverinë mbetet e patundur".
Pak pas vendimit të Renzit, po përmes mediave sociale erdhi përgjigjja e kryetarit të Partisë Demokratike, Nicola Zingaretti, i cili do të shkruante në një postim në Twitter dhe pa përmendur kurrë Renzin, se PD-ja duhet të kthente faqen dhe të ecte përpara:
Gjatë gjithë ditës në Romë ka pasur bisedime në dy fronte: nga krahu pro-Renzit për të bindur anëtarët e PD-së t’i bashkohen dhe nga ai i Zingaretit për t'i bindur të qëndrojnë.
Deri më tani, sipas gazetës italine “Correre della Sera”, 20 nga 111 deputetët e Partisë Demokratike kanë vendosur të largohen bashkë me Renzin. Për të krijuar një grup të ri në Dhomën e Ulët të Parlamentit Italian, Renzit i duhen 20 deputetë. Për pozicionin e drejtuesit të grupit parlamentar emri më i mundshëm është ai i Luigi Marattin. Por situata në Senatin Italian është shumë më komplekse, pasi Renzi nuk mund të krijojë një grup të ri parlamentar sepse ligji italian e ndalon hyrjen e partive të reja që nuk janë marrë pjesë në zgjedhje. Nga grupi e demokratëve në Senat, rreth dhjetë nga 51 senatorë do të largoheshin: Renzi, Bonifazi, Comencini, Marino, Faraone, Ginetti, Cerno, Laus, Grimani dhe Bellanova.
Kjo lëvizje e Renzit mund të shkaktojë një tërmet të vërtetë në Itali, duke e lënë koalicionin qeveritar mes Pesë Yjeve dhe Partisë Demokratike më të brishtë se kurrë.
Mediat në Romë shkruajnë se partia e re e Renzit mund të quhet “Italia del Si”, ndëkohë që ish-kryeministri italian është i bindur se kësaj force të re politike do t’i bashkohet edhe deputetët e Forza Italia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
