Nuk ka më dyshime, Edi Reja do të jetë trajneri i ri i kombëtares shqiptare të futbollit. Tekniku italian ka mbërritur në Tiranë dhe do të dalë para medieve në orën 16:00 bashkë me presidentin e Federatës Shqiptare të Futbollit, Armando Duka.
Trajneri i ri i kombëtares do të prezantohej sot në orën 15:00 sipas njoftimit të FSHF, por për shkak të disa vonesave teknike, konferenca është shtyrë me një orë. Mësohet se trajneri i ri kuqezi ka mbërritur në Tiranë, pasi arriti akordin me Dukën në takimin e fundit që patën në Itali. Pas prezantimit, Reja pritet të fillojë menjëherë nga puna, pasi dy ndeshjet e qershorit për eliminatoret e europianit janë shumë afër dhe skuadra duhet të jetë në formën e saj maksimale për të marrë më të mirën dhe të qëndrojë brenda objektivit për t’u kualifikuar në “Euro 2020”.
Sakaq pas prezantimit në ambientet e FSHF pritet të mësohet edhe stafi që do të ndihmojë Rejan në aventurën kuqezi. Më herët është përfolur si asistent, Alessandro Calori, por emri i tij ende nuk është i sigurt, pasi ky i fundit është nën raport kontraktual me ekipin e tij aktual Ternana.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.