Po kthehet në një telenovelë që po i mban të gjithë në ankth. Trajneri i ri i kombëtares shqiptare të futbollit pritet të marrë një zgjidhje përfundimtare ditën e nesërme. Përmes një njoftimi të shpërndarë për mediet, Federata Shqiptare e Futbollit njofton se presidenti Armando Duka do të dalë ditën nesërme në një konferencën për shtyp. Njoftimi i FSHF sërish lë shumë pikëpyetje pa zgjidhje, pasi nuk specifikohet nëse kreu i futbollit shqiptar do të jetë bashkë me trajnerin e ri.
Gjithsesi Edi Reja duket se është i përzgjedhuri për të pasuar Panuçin në stolin e ekipit kuqezi. Gjatë dy ditëve të fundit emri i teknikut 73-vjeçar është bërë i sigurt se do marrë drejtimin e ekipit kombëtar, por ende pa një konfirmim zyrtar. Nuk do të ishte çudi nëse ditën e nesërme në krahun e tij presidenti i FSHF-së, Armando Duka të kishte edhe trajnerin e ri edhe pse pas Asamblesë së të hënës tha se nuk kishte pasur shumë kohë për t’u marrë me trajnerin e kombëtares këto ditë të fundit.
Sakaq ditën e hënë përveç medieve në Shqipëri edhe ato në Itali e bën fakt të kryer uljen e Edi Rejas në stolin e kombëtares shqiptare. Mësohet ndër të tjera se Reja ka qenë i pranishëm në stadium në ndeshjen Atalanta – Empoli për të parë tre futbollistë shqiptare, por në fakt ka mundur të shikojë në fushë vetëm Veselin, pasi Gjimshiti dhe Berisha ishin lënë në stol.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.