.png)
Rusia i kërkon Shqipërisë që të shpluhurosë një marrëveshje dypalëshe të nënshkruar vite më parë dhe ta ratifikojë atë. Bëhet fjalë për një marrëveshje miqësie, që Sergey Lavrov ja kërkoi nga Moska Edi Ramës që ta nxjerrë për ratifikim.
Ministri i Jashtëm rus tha se potenciali i bashkëpunimit mes dy vendeve është i lartë, por që fatkeqësisht, sipas tij, kufizohet nga sanksionet e vendosura. Ai kërkoi nga pala shqiptare që të ratifikojë një dokument të nënshkruar prej vitesh.
“Kam pasur takime personale në 2004 kur u ëmërova ministër i Jashtëm. Bëra një takim në Tiranë, e më pas nënshkruam një traktat miqësie dhe bashkëpunimi me ministrin e Jashtëm të asokohe. Nuk u ratifikua pasi pala shqiptare e harroi këtë dokument, por ekziston, është gati dhe ne mund ta bëjmë efektiv në mënyrë që të kemi parime të qarta të marrëdhënieve tona”, tha ai, duke shtuar se përgjatë këtij viti do të komunikojë me Ramën në telefon për këtë çështje.
Nga ana e tij, Rama i premtoi se do ta shohë këtë dokument sapo të kthehet në atdhe dhe do ta ratifikojë atë.
“Ka pasur një marrëveshje mes Rusisë dhe udhëheqësit të sotëm të opozitës, por më duhet t'i mbetem parimit, gjithçka është miratuar nga qeveria e mëparshme, nuk është se nuk duhet pranuar nga qeveria aktuale. Kur të kthehem në vend do ta shoh me kujdes dhe do t’u dëshmoj se bëj çfarë them”, u shpreh Rama.
Kosova ka qenë tema tjeter e diskutimit në takimin që Kryeministri Edi Rama pati në Moskë me ministrin e Jashtëm rus, Sergey Lavrov dhe në konferencën e përbashkët për shtyp në përfundim të këtij takimi dolën në pah qëndrimet e kundërta.
Ministri i Jashtëm rus përsëriti qëndrimin e hershëm të Moskës se njohjen e Kosovës do ta ndërmarrë vetëm atëherë kur ajo të jetë rezultat i një marrëveshjeje me Serbinë. Lavrov akuzoi Prishtinën se nuk po zbaton marrëveshjet e nënshkruara me ndërmjetësimin e BE-së në Bruksel, ndërsa vetë BE-në për apati në shtrëngimin e Kosovës për ta detyruar që të zbatojë këto marrëveshje.
“Duhet të ketë zbatim të asaj për të cilën bihet dakord. Ka një rezolutë, rezoluta 1244 dhe ka një sërë marrëveshjesh të arritura mes palëve, përfshirë krijimin e bashkësive serbe në Kosovë dhe krijimi i kësaj do të ishte një hap më përpara për të siguruar respektimin e të drejtave të serbëve. Prishtina refuzon që të respektojë detyrimet. Ne do të pranojmë çdo zgjidhje që arrihet mes dy vendeve. Ne promovojmë këtë dialog, por BE ka vendosur të jetë ndërmjetës dhe kanë arritur disa rezultate, por nuk kanë arritur të sigurojnë zbatimin e marrëveshjeve. Këmbëngul që kjo çështje duhet të zgjidhet në bazë të marrëveshjeve që janë arritur deri më tani”, tha Lavrov.
Nga ana e tij, Kryeministri Rama tha se njohja e Kosovës është në të mirë të kujtdo, përfshirë edhe vetë Serbinë. Sa u takon moszbatimit të marrëveshjeve, Rama nënkupton se peshorja anon më shumë nga ana serbe, ndërsa Lavrovit i shpjegoi, sipas tij, nevojën e rinisjes së më shpejt të dialogut.
“Mendoj se është në të mirë të gjithëkujt, edhe të Serbisë që të njohë Kosovën siç është. Ne e kemi mbështetur dialogun, pajtimin, gjetjen e mirëkuptimit për të arritur realizimin e kësaj njohjeje, jo me parimin e gabuar që njohja nuk ka ndodhur asnjëherë. Ka pasur shumë aspekte të dialogut të materializuara në marrëveshje që nuk e kanë parë dritën e realizimit të tyre në terren. I shpjegova ministrit që duhet të rinisim procesin, sepse kur bëhet fjalë për marrëveshje palët fajësojnë njëra-tjetrën si përherë, por nuk jam këtu për të thënë që pala serbe nuk ka përmbushur marrëveshjet e kështu me radhë, sepse kjo nuk ndihmon”, u shpreh Rama.
Kryeministri Edi Rama ndodhej në Rusi në cilësinë e drejtuesit të Kryesisë së OSBE-së. Takimin me kryediplomatin rus, Rama e nisi duke e përgëzuar për ndryshimet mahnitëse, që tha se kishin ndodhur në Moskë.
“Vij këtu për herë të parë pas 15 vitesh, kur ishte hera e fundit që vizitova këtë qytet, në atë kohë si kryetar bashkie (Tiranës), këtë herë si Presidenti i OSBE-së dhe do të filloja duke ju komplimentuar të gjithëve në këtë qytet, megjithëse e di që është një punë e kryebashkiakut, ndryshimi këtu është mahnitës”, deklaroi Rama.
Zgjidhja e krizës në Ukrainë ishte në fokusin e bisedimet në mes dy delegacioneve të OSBE-së që kryesohet nga Rama dhe ministrit të Jashëmë, Lavrov. Kryediplomati rusi ka deklaruar në këtë takim se Rusia mbështet marrjen e kryesisë së OSBE nga Shqipëria për të krijuar kushte për punë konstruktive në kushtet kur retorika konfrontuese mbizotëron në organizatë.
“Është e panevojshme të thuhet se situata në marrëdhëniet ndërkombëtare nuk është e thjeshtë. Kjo ndikon plotësisht në aktivitetet e OSBE-së, ku, për fat të keq, retorika konfrontuese dhe dëshira për të krijuar polemika në vend që të kërkojnë kompromis. Themelet e konsensusit për punë konstruktive mbizotërojnë. Sigurisht, në këtë situatë, roli i kryetarit është veçanërisht i rëndësishëm. Kryetari mund dhe duhet të kontribuojë në krijimin e kushteve për punë konstruktive, dhe unë jam i kënaqur të vërej se në fjalimet tuaja publike, si kryetari i OSBE-së, ju keni deklaruar “Ne e mbështesim plotësisht këtë””, tha Lavrov.
Agjencia e lajme TASS bën të ditur se Lavrov ka shtuar se takimi aktual gjithashtu do të jetë i dobishëm për sa i përket mundësisë së shkëmbimit të vlerësimeve të marrëdhënieve bilaterale. Nga ana tjetër, Rama theksoi se megjithëse OSBE u krijua 45 vjet më parë, parimet e saj themelore mbeten të pandryshuara.
“Duke pasur parasysh se siguria dhe njerëzit janë gjëja kryesore, unë mendoj se ne të gjithë mund të përpiqemi të bëjmë më shumë dhe shpresoj se më së miri se si do të arrihet. Rusia është një aktor kryesor në një numër formatesh negociatash që duhet të zgjidhin konfliktet në rajonin e OSBE-së. Unë erdha këtu me besimin se ju dhe vendi juaj i bukur të përdorë ndikimin e tyre në këto formate për të lëvizur sa më afër botës aq shumë të nevojshme”, tha ai.
Më pas Rama dhe Lavrov kanë dhë një konferencë për shtyp ku u janë përgjijgur pyetjeve të gazetarëve jo vetëm në lidhje me konfliktit me Krimenë, por edhe për marrëdhëniet mes dy shteteve dhe për çështjen e Kosovës dhe marrëdhëniet me Serbinë.
“Ne kemi folur për Kosovën dhe ne kemi theksuar nevojën për rinisjen për bisedimet mes Prishtinës dhe Beogradit”, deklaroi kryeministri Rama duke theksuar për një zgjidhje të përbashkët për marrëdhëniet mes dy shteteve.
Konferenca mes Ramës dhe Lavrov ka zgjatur 45 minuta dhe në fokus kanë qenë edhe marrëdhëniet mes dy shteteve.
Gjatë fjalës së tij në Këshillin e Sigurimit të OKB, Rama tha se zgjidhja e konfliktit Rusi-Ukrainë, për zonën e Krimesë është një nga prioritetet e tij kryesore në krye të OSBE. Rama është kryeministri i dytë që viziton Moskën, pasi në vitin 1995 ka qënë Aleksandër Meksi, i cili është pritur nga Kryeministri rus i asaj kohe.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
