Janë rreth 176 mijë persona që pritet të përfitojnë nga zgjerimi i paketës financiare të Qeverisë, ku pjesa më e madhe janë punonjës të bizneseve të vogla me xhiro nën 14 mln lek në vit, që u përjashtuan nga paketa e parë.
Nga kjo do të përfitojnë punonjës të biznesit të madh, bizneset e vogla që nuk janë mbyllur me urdhër të Qeverisë, por që për shkak të situatës së krijuar nuk kanë xhiro dhe punonjës në sektorin e turizmit.
"Pagesa përmbledh disa kategori, 10 mijë punonjës në turizëm, 66 mijë punonjës që janë larguar e pezulluar nga biznesi i madh me mbi 14 mln lekë të reja xhiro në vit, 100 mijë punonjës në bizneset e vogla që kanë punuar, por me xhiro minimale dhe nuk përfituan nga paketa e parë”, tha Rama.
Të gjithë punonjësit e këtyre kategorive do të marrin nga 400 mijë lek.
"Për kategorinë e 100 mijë qytetarëve që përfshihen ata që janë në biznesin e vogël, (që nuk u përfshinë në paketën e parë) do vëmë në dispozicion 4 miliardë lekë dhe çdo individi në këtë kategori do t’i japim 400 mijë lekë drejtpërdrejtë.
Për punonjësit që e kanë humbur punën në bizneset private 66 mijë punonjës do vëmë në dispozicion 2.64 miliardë lekë edhe ata do marrin 400 mijë lekë direkt.
Për turizmin, fasonët dhe bizneset prodhuese paketa e zgjeruar ka një instrument të ri financiar që do të krijojë kapital qarkullues, por para se të vij aty, në listën e individëve që do ndihmohen drejtpërdrejt janë edhe 10 mijë punonjës (të turizmit) që do marrin 400 mijë lekë, dhe këtu bëhet fjalë për 4 milionë dollarë të tjera", sqaroi Rama.
Kryeministri e vlerësoi paketën si të mjatueshme për përballimin e 40 ditëve të ardhshme, deri në fund të muajit maj, kur paralajmëron se Qeveria do të ketë gati një paketë tjetër ndihme dhe lehtësish për qytetarët dhe biznesin.
“Ne besojmë se kurba do të shkojë në ulje dhe do të lëvizim jashtë perimetrit ku jemi sot, por me shumë kujdes për kthimin në punë. Por ne do të jemi gati edhe për paketën e tretë mes datave 20-25 maj”, shtoi ai.
Krahas kësaj ndihme të drejtpërdrejtë financiare, Qeveria ka vënë edhe 150 mln dollarë si garanci sovrane për turizmin, fasonët dhe biznesin prodhues dhe ka shtyrë me dy afate pagesën e tatim-fitimit.
“Po ashtu, paketa e zgjeruar përcakton që të gjitha sipërmarrjet, (përjashto sistemin bankar, kompanitë publike dhe ato të zinxhirit të furnizimit me mallra esenciale, telekomunikacionit), pagesat e kësteve të tatim-fitimit do të mund t’i bëjnë pas datës 30 shtator, ndërsa për turizmin, fasonët, call-center dhe bizneset e vogla pagesat e kësteve do të shtyhen përtej 31 Dhjetorit të këtij viti, pra pagesat e kestëve të tatim-fitimit. Shlyerja e këtyrë pagesave më pas do të bëhet në mënyrë proporcionale”, saktësoi ai. Kjo paketë e zgjeruar, sipas tij, do të miratohet në 48 orët në vijim dhe shumat përkatëse do të fillojnë të lëvrohen për të gjithë nga data 20 prill.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.