.png)
176 mijë personat që përfitojnë pagesën prej 40 mijë lekësh të reja në llogaritë e tyre si pjesë e zgjerimit të paketës së ndihmës financiare në kuadër të luftës kundër koronavirusit do të mund të tërheqin këto para duke filluar nga java e ardhshme.
Kryeministri Edi Rama shkoi në rrjetet sociale se duke filluar që prej 20 prillit do të nisë disbursimi i këtyre parave në llogaritë përkatëse, ndërsa brenda muajit dha si afat përmbylljen e të gjithë procesit për të trija këto kategori.
“100 mijë të punësuar në bizneset e vogla, të cilat janë goditur në xhiron e tyre gjatë javëve të kufizimit të lëvizjeve, 66 mijë punonjës në bizneset e mëdha, që janë goditur gjatë këtyre javëve në vendet e tyre të punës, 10 mijë të punësuar në sektorin e turizmit, nga data 20 prill, shuma prej 40 mijë lek do të fillojë të derdhet në llogaritë e të gjithë këtyre individëve dhe brenda muajit të 176 mijë familjet përkatëse do ta kenë marrë atë”, shkruan Kryeministri Edi Rama.
Rama parashikon që fundi i muajit maj të sjellë një normalizim të ndjeshëm në tregun e punës dhe një pjesë e madhe e personave që përfitojnë këtë pagesë në prill të rikthehen në punë në këtë periudhë.
Megjithatë, një ditë më parë, Kryeministri nuk përjashtoi mundësinë e një pakete të tretë ndihme financiare që Qeveria do të diskutojë në fund të muajit maj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
