Kryeministri Edi Rama ka inspektuar ditën e sotme kantierin e konvikteve të Inxhinierisë së Ndërtimit dhe disa prej rezidencave ku janë akomoduar studentet.
Kreu i qeverisë ka parë nga afër dhomat dhe kushtet e reja që ofrojnë konviktet. Deri më tani janë dy godina të mbaruara, ku bie në sy ndryshimi me godinat e vjetra. Aktualisht janë akomoduar 570 studentë, ndërsa deri në përfundimin e rikonstruktimit të plotë të katër rezidencave pritet që të akomodohen 1080 studentë. Ndër risitë e këtyre godinave janë interneti në çdo dhomë, kuzhina në çdo kat, sistemi i emergjencave. Kryeministri Rama u takua edhe me studente.
“Në kantierin e konvikteve të Inxhinierisë së Ndërtimit (Rezidencat A/B/C dhe D), ku falë marrëveshjes me qeverinë gjermane, 1080 studentë do të akomodohen në kushte optimale, brenda muajit mars. Atyre që e kanë shkruar pikën 1 të 8 kërkesave të studentëve, u them se plani ynë për përmirësimin e kushteve në konvikte, ka nisur të zbatohet kohë më parë. Por, nga ana tjetër, kjo pikë e artikuluar së fundmi, si një kërkesë e studentëve, është një shtysë e nevojshme për të ecur më shpejt”, shkruan Rama.
Ndërkohë, i menjëhershëm ka qenë reagimi i kryetares së Lëvizjes Socialiste për Integrim, Monika Kryemadhi. Në një transmetim live nga FB, Kryemadhi u shpreh se ky nuk është një investim i qeverisë shqiptare, por është projekt i qeverisë gjermane. Për më tepër, sipas saj ky projekt duhet të kishte përfunduar tashmë.
Kryemadhi paralajmëroi Ramën se nuk do i ndahet këmba-këmbës pas çdo mashtrimi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.