Prej më shumë se një muaji, Kimi Raikonen nuk është më zyrtarisht pilot i Formulës 1. Finlandezi i datëlindjes 1979 preferoi ta mbyllte karrierën në Çmimin e Madh të Abu Dhabit 2021, pas 19 sezonesh. Tani, pas pak kohësh, kampioni i botës në vitin 2007 duket se nuk ka asnjë keqardhje për atë që ka lënë pas. Ai ka thënë në një intervistë për “Motorsport.com” se ka shumë gjëra që e prishin ambientin e këtij sporti.
Falsitet dhe elementë të jashtëm te Formula 1: kjo është akuza e Raikonen. “Ka shumë gjëra që nuk kanë sens, të paktën për mua, në Formulën 1. E dimë, por askush nuk thotë asgjë. Ka shumë falsitet në ambient dhe është më bukur të jesh jashtë tij”, - është shprehur piloti finlandez.
Më pas, Raikonen flet edhe me detaje: “Paratë i kanë ndryshuar gjërat edhe në këtë ambient, ashtu si në çdo sport. Sa më shumë të futen paratë, aq më shumë futet edhe politika. Ndodh kështu kudo, në çdo vend. Besoj se njerëzit kanë qejf të kenë fuqi. Ka shumë edhe në F.1 që mund të bëjnë mirë edhe në politikën e vërtetë”.
Deklaratat e Raikonen zbulojnë një F.1 shumë më ndryshe nga ajo që imagjinojnë të apasionuarit pas këtij sporti. Ish-piloti i MekLarenit dhe Ferrarit shpjegon: “Ka qenë kështu për shumë vjet, ndërsa njerëzit mund të kenë kuptuar më mirë tani. Unë nuk kam lejuar të përfshihem në aspektin politik. Di shumë gjëra që ndodhin aty, por kam preferuar të qëndroj jashtë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.