.png)
Inteligjenca Artificiale gjeneruese mund t’ju japë një ndihmesë të çmuar, nëse dini ta përdorni.
IA gjeneruese mund të përdoret në mënyra të ndryshme, duke i ndihmuar njerëzit të rriten në karrierë, duke përfshirë kodifikimin, shkrimin, ndihmesë në CV e shumë të tjera.
Megjithatë, për të përfituar prej saj, është e nevojshme, së pari, të dini si ta përdorni, gjë që është pengesë për shumë njerëz.
Salesforce kreu një sondazh te 4 mijë punonjës që punojnë në zyrë, në lidhje me mendimin e tyre për IA dhe rezultatet ishin mjaft pozitive.
54% e punonjësve të anketuar mendon se IA gjeneruese mund t’i ndihmojë të rriten në karrierë.
65% mendojnë se IA gjeneruese do t’i lejojë ata të përqendrohen te një punë më strategjike,
Pavarësisht optimizmit, punonjësit thonë se nuk zotërojnë aftësitë e nevojshme për të përdorur siç duhet IA gjeneruese apo për të përfituar nga kjo teknologji.
62% e të anketuarve deklaruan se nuk zotërojnë aftësitë e nevojshme për të përdorur IA gjeneruese në mënyrë efikase dhe të sigurt.
Më shumë se gjysma e të anketuarve (53%) deklaruan se nuk dinë se si të përfitonin sa më shumë nga IA gjeneruese.
Në veçanti, 43% e të anketuarve thotë se nuk di se si ta përdorë IA gjeneruese, duke ruajtur të sigurta të dhënat.
Ky është një shqetësim i zakonshëm i përdorimit të IA gjeneruese në punë, pasi IA gjeneruese përdor në përgjithësi të dhënat dhe inputet e përdoruesve për të trajnuar më tej modelet e tyre, gjë që vë në diskutim sigurinë e të dhënave.
Mungesa e aftësive të përshtatshme konfirmohet edhe nga pjesa më e madhe e drejtuesve të sipërmarrjeve (70%) që thonë se ekipet e tyre nuk kanë aftësitë e nevojshme për të përdorur në mënyrë të sigurt IA gjeneruese.
Megjithatë, drejtuesit e biznesit mund të jenë përgjegjës për mungesën e gatishmërisë së anëtarëve të ekipit.
Dy të tretat e punonjësve të anketuar deklaruan se presin që punëdhënësit t’u ofrojnë mundësi trajnimi, por ata nuk u kanë ofruar trajnim mbi këtë teknologji.
Me aftësitë dhe përdorimin e duhur, punonjësit dhe kompanitë mund të rrisin produktivitetin dhe të marrin ndihmë në përmbushjen e qëllimeve të tyre përfundimtare. Megjithatë, kjo kërkon trajnim dhe edukim mbi këtë temë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
