Paralelisht me mbledhjen e qeverisë në Tepelenë, nga selia e PS-së nisën lëvizjet e para.
I komanduar deri në shtator si Sekretar i Përgjithshëm i PS-së, Blendi Klosi, lajmëroi një bashkëbisedim për mediat nga selia e partisë aty ku dalja e fundit ishte për fitoret njëpasnjëshme nga zgjedhjet e 14 majit.
Në këtë konferencë, Blendi Klosi tha se do të përcaktojë objektivat si forcë politike që do t’i paraprinë më pas vendimeve që do të merren në kongresin e jashtëzakonshëm të PS në vjeshtë
Në fillim të konferencës ishte Damian Gjiknuri që i kaloi stafetën Blendi Klosit ku nuk la pa theksuar fillim e mbarim të fjalës së tij se PS-ja kishte korrur fitore historike, porse sipas tij edhe në rezultat fitore volitet për riorganizim.
“Rezultati në 2021 ka qenë rezultat historik dhe PS sërish iu nënshtrua edhe atëherë riorganizimit, gjatë punës sime ka qenë një punë intensive. Në zgjedhjet e fundit PS ka arritur të marrë një fitore historike edhe atëherë PS iu nënshtrua zgjedhjeve duke e bërë këtë forcë politike një organizatë permanente me kapacitet me të dhëna të mjaftueshme...”, tha ai, duke nënvizuar më pas se sekretariati u shkri me nevojën e riorganizimit të partisë sepse “në shtator PS do futet në proces zgjedhjesh të gjithë organizatave”
Gjiknuri tha se nuk ndihet i braktisur nga kryetari i partisë dhe se më këtë të fundit ka një marrëdhënie të qëndrueshme pune në afërsi dhe distancë aq sa i lejon pozicioni i gjithesecilit prej 20 vitesh.
Gjiknuri tha se nuk ishte e papritur lëvizja e tij, se ishte mësuar me ndryshime por nuk i fshehu hatërmbejtjet ndër rreshta.
“Njeriu në pozicione të ndryshme tregon edhe veten e tij, posti nuk të jep forcë por të nxjerr në pah dobësitë e karakterit...”, tha ai.
Gjiknuri tha se është i hapur edhe për drejtesinë.
Sekretari i sapoemëruar i Përgjithshëm i Partisë Socialiste, Blendi Klosi tha se marrja përsipër e kësaj detyre është tepër e rëndësishme dhe kërkon një angazhim maksimal, për ta çuar para këtë forcë politike, e cila sipas tij ka dëshmuar se dita e zgjedhjeve për të është një ditë lufte, gare e fitoreje.
Klosi tha se ndër objektivat më primare nën drejtimin e Partisë Socialiste është sigurimi i fitores së zgjedhjeve të vitit 2025.
“Detyra e Sekretarit të Përgjithshëm të PS-së është një detyrë shumë e rëndësishme. PS e ka dëshmuar në gjithë këto vite se dita e zgjedhjeve për të është një ditë lufte, gare, fitoreje. Dhe dita pa zgjedhje është dita e parë e të menduarit për zgjedhjet e ardhshme. Z. Gjiknuri ka bërë një punë shumë të mirë. Së bashku do ta çojmë në një garë të fortë fitoren e 2025-s, ku Partia Socialiste shkon jo vetëm për të marrë mandatin e saj të katërt, por njëkohësisht me fitoren e këtyre zgjedhjeve të kemi një parti të re, një parti që reformohet, një parti që gjen forcën te struktura e saj, te njerëzit e saj, te mbështetësit e saj, tek ata që presin vetëm te Partia Socialiste e Shqipërisë të ecin përpara. Kjo detyrë do na detyrojë të punojmë shumë, të kemi orë të zgjatura me gjithë strukturën e partisë në çdo zonë, në çdo lagje, për të kuptuar se çfarë njerëzit duan nga Partia Socialiste”, tha Klosi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.