.png)
Italia është tronditur mbrëmjen e djeshme nga protesta të dhunshme kundër kufizimeve të reja për të frenuar valën e dytë të koronavirusit.
Mediat italiane raportojnë për përplasje mes protestuesve dhe disa qytete të mëdha, përfshirë Torinon, ku dhjetra bombash molotov u hodhën ndaj oficerëve. Në Milano policia përdori gaz lotësjellës për të shpërndarë protestuesit, ndërkohë që përplasje të dhunshme u raportuan gjithashtu në Napoli.
Demonstratat filluan ditën e parë pasi hyri në fuqi urdhri i qeverisë për të mbyllur restorantet, baret, palestrat dhe kinemanë pas orës 18:00.
Shumë rajone kanë vendosur gjithashtu ndalimin e qarkullimit pas mesnatës, duke përfshirë Lombardinë. Protestat u zhvilluan në më shumë se 12 qytete të tjera, duke përfshirë Milanon, Piemonten, Romën, Xhenovën, Palermon dhe Triesten.
Edhe pse hyrja në karantinë në fillim të këtij viti u prit në mënyrë paqësore, njoftimi i masave të reja ka ngritur frikën se vendi fqinj mund të hyjë sërish në izolim, një skenar që po hidhet me forcë poshtë nga qytetarët.
Bizneset e vogla argumentojnë se janë ende duke u rikuperuar nga bllokim i parë dhe se vendosja e këtyre kufizimeve mund t'i falimentojnë.
Një sërë dyqanesh luksoze në Torino, duke përfshirë butikun e Guccit, u shkatërruan nga turmat që pushtuan rrugët pasi rregullat hynë në fuqi. Në Milano, turmat brohorisnin "Liri, liri, liri!" ndërsa u përleshën me policinë në qendër të qytetit.
Protesta të ashpra shpërthyen edhe në Spanjë, ku qytetarët u përplasën me policinë në Madrid dhe Barcelonë.
Çfarë masash ka marrë Italia?
Restorantet, baret dhe kafenetë duhet të ndalojnë shërbimin në orën 18:00 dhe të ofrojnë vetëm me shpërndarje deri në mesnatë. Sportet janë të ndaluara, por dyqanet dhe shumica e bizneseve do të qëndrojnë të hapura. Kufizimet e reja, të cilat janë në fuqi deri më 24 nëntor, përcaktojnë se 75% e klasave në shkollat e mesme dhe universitetet e Italisë të zhvillohen online.
Qeveria gjithashtu po i nxit njerëzit të mos udhëtojnë jashtë qyteteve të tyre të lindjes ose qyteteve të tjera nëse nuk është e nevojshme dhe të shmangin përdorimin e transportit publik nëse është e mundur.
"Ne mendojmë se do të vuajmë pak këtë muaj por duke shtrënguar rripin me këto kufizime, do të jemi në gjendje të marrim frymë përsëri në dhjetor," tha kryeministri Xhuzepe Konte në një konferencë shtypi të dielën.
Çfarë po ndodh në Europë?
Palestrat dhe pishinat janë mbyllur gjithashtu në Bruksel, dhe dyqanet duhet të mbyllen në orën 20:00. Maskat tani janë të detyrueshme në hapësirat publike. Këto rregulla do të qëndrojnë në fuqi deri më 19 nëntor.
Ndërkohë mjekëve në qytetin belg të Liège u është kërkuar të vazhdojnë të punojnë, edhe nëse kanë koronavirus. Kreu i Shoqatës belge të sindikatave mjekësore tha se ata nuk kishin zgjidhje tjetër nëse donin të parandalonin shembjen e sistemit spitalor brenda ditësh.
Në Francë, ekspertët e shëndetit kanë paralajmëruar se numri i rasteve të reja Covid-19 në ditë mund të jetë rreth 100,000, dyfishi i shifrës zyrtare.
Prof Jean-François Delfraissy, kreu i këshillit shkencor të Francës i cili këshillon qeverinë për pandeminë, tha se shifra e vlerësuar përfshinte rastet e padiagnostikuara dhe asimptomatike.
Ai i tha ishte i befasuar nga "brutaliteti" i valës së dytë duke thënë se priste të ishte shumë më e rëndë se e para, duke shtuar: "se shumë nga bashkëqytetarët nuk e kanë kuptuar ende se çfarë na pret".
Franca tashmë ka vendosur ndalimin e lëvizjes gjatë natës në qytetet kryesore, përfshirë Parisin. Vendi ka regjistruar më shumë se 1.1 milion raste në total dhe 34,780 vdekje.
Republika Çeke gjithashtu ka futur një shtetrrethim gjatë natës, i cili hyri në fuqi të martën në mesnatë. Askush nuk do të lejohet të largohet nga shtëpitë e tij ndërmjet orës 21:00 dhe 04:59 çdo natë përveç për të shkuar në punë. Të gjitha dyqanet do të mbyllen pas orës 20:00.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
