.png)
Nga Gazeta Si - Shtyhet afati për mbylljen e fazës së parë të Konkursit Ndërkombëtar: “Art në Hapësira Publike” deri më 19 gusht.
Ministria e Kulturës njofton se shtyrja është bërë për shkak të sulmit kibernetik në sistemin online qeveritar, në mënyrë që të rikuperohen pengesat e hasura nga aplikuesit, gjatë ditëve të mosfunksionimit të adresave zyrtare.
Faza e parë e këtij konkursi, ajo e dorëzimit të dosjes së aplikimit dhe projekt-idesë ishte parashikuar të mbyllej në datën 7 gusht 2022. Pas kësaj shtyrjeje, afati i fundit i aplikimit do të jetë data 19 gusht 2022.
Ministria thotë ndër të tjera se “Art në Hapësira Publike” është një nismë shumëplanëshe, për të cilën qeveria shqiptare ka akorduar një fond prej rreth 200 milionë lekësh.
“Përmes kësaj nisme synohet vendosja e një sistemi kriteresh të sakta, në bashkëpunim me institucione të tjera, si Autoriteti Rrugor Shqiptar, Agjencia Kombëtare të Planifikimit të Territorit, pushteti lokal etj., për të respektuar kodin rrugor, planet e përgjithshme urbane, projektet e reja në infrastrukturë, mjedisin, por edhe identitetin e zonës”, thuhet në njoftimin e Ministrisë.
Kjo nismë e qeverisë do të angazhojë artistë shqiptarë e të huaj të arteve pamore, arkitektë, dizajner, inxhinierë ndriçimi etj.
“Nga ana tjetër do të ndikojë në përmirësimin e imazhit të hapësirave publike, gjithnjë duke iu përshtatur karakteristikave të zonës, në mënyrë që ato të jetë sa më atraktive dhe të jenë një vlerë e shtuar për hapësirën ku do të ngrihen”, vijon më tej njoftimi.
Janë identifikuar 18 hapësira publike (1 institucion publik - spital), 12 rrethrrotullime, 4 mbikalime, 1 nyje infrastrukturore) nga Veriu në Jug.
Janë më së shumti rrethrrotullime, institucione publike apo mbikalime, si dy rreth rrotullime në Koplik, dy në Bajzë, Divjakë, Grabian, Kavajë, mbikalimi te “Plepat”, mbikalimi te “Pallati me shigjeta”, Qendra Spitalore Universitare “Nënë Tereza” etj.
Në fazën I aplikanti paraqet projektidenë dhe dosjen e tij (jetëshkrimin, një shprehje interesi, një vetëdeklaratë mbi të drejtën e autorit).
Në fazën II, në rast përzgjedhjeje aplikanti duhet të dorëzojë projektin e detajuar (teknik, arkitektonik, të sistemimit të mjedisit përreth, konstruktiv, elektrik, hidtroteknik etj.), preventivin e detajuar, fazat e realizimit të veprës etj.
Artistët mund të aplikojnë me 3 projektide, për 3 lokacione të ndryshme.
Shpërblimi për artistët fitues do të jetë 700, 000 lekë.
Vendndodhjet:
Rrethrrotullim në hyrje të Koplikut
Rrethrrotullim në dalje të Koplikut
Rrethrrotullim në hyrje të Bajzës
Rrethrrotullim në dalje të Bajzës
Rrethrrotullim në hyrje të kryqëzimit të Doganës
Mbikalimi te Pallati me shigjeta
Mbikalimi në Plepa
Rrethrrotullim në Golem, plazh
Rrethrrotullim në Malin e Robit (hyrje-dalje)
Mbikalimi në Kavajë, Veri (hyrje-dalje)
Mbikalimi në Gosë
Rrethrrotullim në Rrogozhinë
Rrethrrotullim në Divjakë
Rrethrrotullim në Grabjan
Rrethrrotullim në Plug, hyrje Lushnjë
Nyja Levan (hyrje-dalje Tepelenë)
Rrethrrotullim në Gjirokastër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
