.png)
Zgjedhja e Ilija Iviç, një futbollist 17-vjeçar nga Graçanica për të luajtur me Kosovën U-19, ka shkaktuar zemërim të madh në Serbi, ku autoritetet nuk e njohin kombëtaren e Kosovës, ashtu sikurse nuk e njohin edhe Kosovën si shtet. Drejtuesit e klubit kryeqytetas Flamurtari, ekip ku aktivizohet lojtari, kanë njoftuar Federatën e Kosovës me vendimin e komunës së Graçanicës, për të pushuar nga puna prindërit e djaloshit. Babai i Iviç punonte arsimtar, ndërsa nëna e tij ka qenë e punësuar si shërbyese civile në këtë komunë.
Komiteti Ekzekutiv i FFK-së, ka dënuar ashpër këtë akt. Drejtuesit e futbollit kosovar kanë deklaruar se përkrahin vendimin e trajnerit Ramiz Krasniqi për të grumbulluar talentin Ivic. Ata kanë kërkuar nga institucionet vendore e ndërkombëtare si dhe nga UEFA e FIFA që të reagojnë fuqishëm në parandalimin e dukurive të tilla diskriminuese që vijnë në vazhdimësi nga shteti serb.
Edhe kryeministri i Kosovës, Albin Kurti ka reaguar në lidhje me këtë rast. Kurti përmes një postimi në twitter ka thënë që futbollisti i është nënshtruar një ndarje të influencuar nga Beogradi për shkak të vendimit.
I fundit që ka folur për këtë situatë është ish-lojtari i Përfaqësueses së Serbisë, Milan Jovanović, i cili e ka këshilluar të riun të mos pranojë e ftesën, siç e quan ai nga një shtet inekzistent, por të presë Serbinë. “Nëse do të ishte e nevojshme, do të prisja ftesën e vendit tim deri në moshën 33 vjeçare. Për sa kohë që ekziston mundësia, do të prisja Serbinë, kështu duhet të bëjë edhe ai”, tha Jovanović për portalin serb Kurir.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
