Takimin me të rinjtë në zonën e Devollit e bindi edhe më fort Lulzim Bashën në akuzën e hedhur ndaj Kryeministrit Edi Rama se i ka lënë vetëm dy zgjidhje rinisë.
“Në mungesë të politikave të punësimit, e vetmja zgjidhje që Edi Rama i ka lënë rinisë është, ose të merret me drogë, ose të emigrojë”, deklaron kreu i PD-së.
Basha paralajmëron një skenar tragjik, jo vetëm për këtë brez, por për të gjithë vendin dhe si rrugëdalje sheh vetëm alternativën e opozitës.
“Nëse kjo vazhdon vendi do të marrë fund! Me të rinjtë e Devollit diskutuam për vështirësitë që të rinjtë kanë për të vazhduar studimet e larta për shkak të rritjes së tarifave dhe prej papunësinë”, thotë ai.
Kryetari i PD-së bën publik edhe vendimin e parë që do të marrë kur të vijë në pushtet.
“Detyra e parë e qeverisë së PD do të jetë përgjysmimi i tarifave për arsimin e lartë dhe pagesa e stazheve për të sapodiplomuarit. Do hartojmë ligj të ri në mënyrë që çdo i ri dhe e re shqiptare të ndjekë studimet pavarësisht nga mundësitë ekonomike të familjes”, thotë Basha.
“Një vend, rinia e të cilit në shumicë kërkon të largohet, shkon drejt shuarjes por bashkë me vendosmërinë e të rinjve shqiptarë, këtë nuk do e lejojmë!”, mbyll postimin e tij në rrjetet sociale kryetari i PD-së.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
