.png)
Në tavolinën e diskutimit politik janë listat dhe koalicionet parazgjedhore por, Jozefina Topalli përcjell përmes faqes së saj në Facebook një tjetër debat që lidhet me pragun e dyfishtë elektoral; 3%.
“Pragu elektoral i dyfishtë është përpjekje e shëmtuar kundra vullnetit të qytetarëve që duan ndryshim.
Heshtja e opozitës ndaj propozimit të Ramës për prag shtesë, konfirmon marrëveshjet e fshehta me qëllim ruajtjen e karrigeve të kryetarëve.
Ndryshimi i sistemit elektoral nuk është gjë e keqe në vetvete, - ai mund të përmirësohet- por është e dëmshme kur ndryshon vetëm pak muaj para zgjedhjeve dhe kur në përmbajtje redukton mundësinë e përfaqësimit të qytetarëve që kërkojnë ndryshim”, shkruan Topalli.
Në çdo sistem elektoral, sipas saj, pragu është kyç.
“…Sistemi me prag të dyfishtë është i mirë për tre kryetarët e partive, por është i keq për parlamentin dhe demokracinë.
Llogaritë politike të kryetarëve e bënë pragun axhendë personale të tyre duke bërë një prapaktheu të rëndë.
Pragu elektoral është një ndër mekanizmat bazë për përjashtimin e përfaqësimit në parlament të votuesve që janë kundra skenës së vjetër politike”, shkruan ajo.
Sipas saj, vendosja me ligj e një pragu të dytë elektoral kombëtar është mbyllje hermetike e sistemit të vjetër të kryetarëve.
“Pragu i ri i propozuar nga PS në dakordësi me Kryetarin e opozitës përmes heshtjes se turpshme është goditja më e madhe që i bëhet demokracisë shqiptare me ligj.
Të kesh sistem proporcional rajonal me pragun përkatës si Spanja e t’i shtosh një prag tjetër nacional, dmth ta bësh me dy pragje të çon drejt modeleve të Lukashenkos, që mbretëron prej 30 vitesh.
Pragu dyfish i propozuar është paradhoma e çimentimit të një sistemi autokratik, kundra interesit të qytetarëve dhe kundra ndryshimit të mundshëm.
Heshtja e Lulzim Bashës për propozimin e vendosjes së pragut të dyfishtë nga Rama është konfirmim tjetër i lojës hileqare të tyre, sikurse është konfirmim i marrëveshjeve të fshehta në kalkulim të politikave personale e karrigeve të tyre dhe kundra interesit të qytetarëve!”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
